Тамыз айының басында аудан орталығында тұратын тағы бір көпбалалы отбасын қамқорлықтарына алды. Ескі үйдің орнына жаңа баспана соғуға қарекет жасаған жандарға қолдау танытып, есік пен еденін, шиферін жеткізіп берді. Жас кәсіпкер Бақытжан Дәндібаев бөрене түсіріп берсе, атын атамауды сұраған тағы бір жомарт жан шатырға қажетті ағаштарын жеткізіпті.
Осы жазда аяқасты көтерілген дауыл кенттегі Саяжай шағын ауданындағы А.Көшербаеваның үйінің шатырын ұшырып кеткен болатын. Науқас баласы бар ана жаңбырлы күндері үйдің төбесінен аққан су еденіне жеткенде көптен көмек сұрапты. «Жаңарған Жаңақорған жастары» бұл өтінішті де аяқсыз қалдырған жоқ. Топ белсенділері Дәулет Тұрабаев пен Наржан Молдабеков ерікті жастардың көмегімен жылу жинады. Аз уақыттың ішінде қажетті материалдар алып, үйдің шатырын қағып берді.
Көпке көмегін тигізіп жүрген кейінгі толқынның игі істері ескерусіз қалған емес. Биыл «Жомарт жүрек» сыйлығын табыстауға арналған шарада топ мүшесі Қоғамбек Мүтанұлы «Ерен еріктілік» номинациясымен марапатталды.
Жаңа оқу жылы басталар сәтте «Жаңарған Жаңақорған жастары» қоғамдық қорының ұйымдастыруымен «Мектепке жол» қайырымдылық акциясы өтті. Акция аясында әлеуметтік жағынан аз қамтылған отбасы балаларына оқуға қажетті құрал-жабдықтар салынған 90 сөмке табысталды. Онлайн оқуға қажетті құрылғы таппай қиналып отырғандар балаларға 14 смартфон алып берді.
– Көмекке шын мұқтаж адамның меселін қайтарып, қолын қаққан кезіміз жоқ,– дейді қор мүшесі, аудандық мәслихат депутаты Арман Мәжитов. – Бірақ мемлекеттен де, айналасынан да үнемі көмек дәметіп, соны кәсіп қылып алғандар да жоқ дей алмаймыз. Сондықтан да біз «Қиналғанға балық емес, қармақ бер» деген ұстанымдамыз. Осы бағытта өзара ақылдасып, алдағы уақытта қолынан іс келетін, бірақ материалдық мүмкіндігі жоқ жандарға қажетті құрылғыларын алып беріп, кәсіп бастауына жол ашпақпыз.
Жастар өз қатарларын кәсіпке баулу бағытында да түрлі шаралар ұйымдастырып келеді. Мысалы, жуырда қоғамдық қор мен «Qamqor» әлеуметтік дүкені кондитерлік өнімдер пісіруден тегін шеберлік сағатын өткізді. Көп ұзамай «Жастар ресурстық орталығы» КММ-ның қолдауымен қор мен әлеуметтік дүкен отбасылық сайыс ұйымдастырды. Отбасы құндылықтары мен саламатты өмір салтын насихаттауға арналған шарада қатысушы командалар бағалы сыйлықтармен марапатталды. Бас жүлдеге берілген велосипед Ибрагимовтер отбасына бұйырды.
Жастардың бастамасымен әрбір жұма күні әлеуметтік дүкенде «Тегін нан» қайырымдылық акциясы тұрақты өткізіліп келеді.
Қызылорда облысы
