Қазақстан Республикасы Мемлекеттік қызмет істері агенттігінің Солтүстік Қазақстан облысы бойынша аумақтық департаменті «Егемен Қазақстан» газетінің үстіміздегі жылғы 31 қазандағы нөмірінде жарияланған «Жемқорлық жоқ дегенге кім сенеді?» атты мақалаға орай төмендегі жайларды хабарлайды.
Қазақстан Республикасы Мемлекеттік қызмет істері агенттігінің Солтүстік Қазақстан облысы бойынша аумақтық департаменті «Егемен Қазақстан» газетінің үстіміздегі жылғы 31 қазандағы нөмірінде жарияланған «Жемқорлық жоқ дегенге кім сенеді?» атты мақалаға орай төмендегі жайларды хабарлайды.
Тәртіптік кеңеске биылғы жылдың 6 тамызында коммуналдық тұрғын үй қорынан тұрғын үй беру барысында «Сыбайлас жемқорлыққа қарсы күрес туралы» Заңның 12-бабы 1-тармағы 10-тармақшасында көзделген сыбайлас жемқорлыққа жағдай туғызатын құқық бұзушылық жібергені үшін Петропавл қаласы прокурорының тұрғын үй комиссиясына шара қолдану туралы ұсынысы түсті. Оны кеңес отырысына дайындау барысында прокуратураның облыс және қала әкімдіктері атына да ұсыныстар жолдағаны белгілі болды. Осыған сәйкес, қала тұрғын үй-коммуналдық шаруашылығы, жолаушылар көлiгi және автомобиль жолдары бөлiмi сектор меңгерушісі мен инспекторы тәртіптік жауапкершілікке тартылған. Ал тәртіптік кеңес хатшылығы ұсынысқа сәйкес тексеріс жүргізіп, нәтижесінде қызметтерінде жіберілген сыбайлас жемқорлыққа жағдай туғызатын құқық бұзушылық деректері болған тұрғын үй комиссиясы мүшелеріне қатысты тәртіптік іс қозғады. Кеңес отырысына дейін оның мүшелеріне алдын ала зерделеу үшін тәртіптік істер құжаттарының көшірмелері жіберілді.
Прокурордың ұсынысында көрсетілген деректерді талқылау барысында тәртіптік кеңес мүшелерінің пікірлері екіге жарылды. Атап айтқанда, кеңес төрағасы мен кеңес мүшесі «Қызылжар-Ақпарат» ЖШС директоры тұрғын үй комиссиясы мүшелерінің іс-әрекеттерінде сыбайлас жемқорлық құқық бұзушылықтар бар деп есептеп, оларды жемқорлыққа жағдай туғызатын құқық бұзушылық жасағандары үшін жауапкершілікке тартуды ұсынды. Қалған кеңес мүшелері ұсыныста көрсетілген дәлелдердің 2006-2008 жылдарғы облыстық прокуратураның актілеріне қайшы келетініне назар аударды. Ол актілерге сәйкес тұрғын үй жағдайын жақсартуға мұқтаж тұлғаларға тұрғын үй ұсынудан бас тарту (нормативтерге сәйкес келмейтін) заңсыз болып табылады, отбасының басқа мүшелерінің ортақ меншік құқығындағы тұрғын үйі бар тұлғалар тұрғын үйлері жоқ деп танылады және есептен шығаруға жатпайды. Сондықтан, кеңес мүшелерінің басым көпшілігі прокурордың ұсынысында көрсетілген тұрғын үй комиссиясы бір адамға екінші рет үй берді деген айыпты негізсіз деп тапты.
Бұдан басқа, кеңес мүшелері тұрғын үй комиссиялары туралы Үлгілік ережеде мүліктің бар-жоқтығы туралы сұрауды жалпы республикалық деңгейде анықтау қажеттілігі тікелей көрсетілмегеніне назар аударып, ұсыныста аталған кемшіліктер тұрғын үй комиссиясы мүшелерінің іс-әрекеттерінен емес, құжаттарды дайындаған мамандардың кінәсінен жіберілген деген пікірге тоқталды. Сонымен қатар, істі қарау барысында қала прокуроры кеңес мүшелерінің сұрағына тұрғын үй комиссиясымен азаматтарға тұрғын үй ұсынғанда кезектіліктің бұзылмағаны туралы түсініктеме берді. Нәтижесінде, тәртіптік кеңес төрағасы және кеңес мүшесі «Қызылжар-Ақпарат» ЖШС директоры тұрғын үй комиссиясы әрекетінде сыбайлас жемқорлық құқық бұзушылық бар деп есептеп, тиісті жауапкершілікке тарту қажет деп дауыс берді. Ал қалған тәртіптік кеңес мүшелері тұрғын үй комиссия мүшелерінің іс-әрекеттерінде сыбайлас жемқорлық құқық бұзушылық белгілерінің жоқтығы жөнінде қорытынды жасап, тәртіптік істі тоқтату қажет деп дауыс берді.
Отырыс қорытындысы бойынша, Мемлекеттік қызмет істері агенттігінің Солтүстік Қазақстан облысы бойынша департаменті Құрылыс және тұрғын үй-коммуналдық шаруашылық істері агенттігіне жалпы республика аумағы бойынша жылжымайтын мүліктің бар-жоқтығы туралы сұрауды жолдауды комиссия міндеттеріне қосу жөнінде тұрғын үй Үлгілік ережесіне өзгерістер енгізу туралы ұсыныс хат жолдады.
Мұрат ҚАДЫРБЕК,
Мемлекеттік қызмет істері агенттігі Солтүстік Қазақстан облысы
бойынша аумақтық департаментінің
басшысы, тәртіптік кеңес төрағасы.
