Батыс Қазақстан облысында аймақ бойынша экономикалық тергеу департаменті тергеу бөлімінің аға тергеушісі ұсталды. Сонымен қатар, ТЖД жедел басқармасы жедел уәкіліне қатысты да тергеу амалдары басталған.
"2020 жылдың 1 қазанында басқа органның өндірісінде қаралып жатқан қылмыстық істі тоқтатуға көмектесу деген сылтаумен азаматтың алдау және сеніміне қиянат жасау арқылы олар бес миллион теңге көлемінде қаражат иемденді. БҚО бойынша ЖСҚ қызметкерлері ҚР Қылмыстық іс жүргізу кодексінің 128-бабына сәйкес ұсталып, уақытша ұстау изоляторына орналастырылды", делінген сыбайлас жемқорлыққа қарсы қызметтің хабарламасында.
Сондай-ақ, сыбайлас жемқорлыққа қарсы қызметтің қызметкерлері Алматы қалалық полиция департаментінің Медеу АПБ тергеушісі пара алды деген күдікке ілінгенін де атап өтті.
"Ол алдау және сеніп тапсырылған бөтеннің мүлкін ұрлау фактісі бойынша қылмыстық істі тоқтату үшін компания директорынан алдын ала келісілген 30 000 доллардың 26 800 доллары көлемінде пара алды деп күдіктелуде", дейді сыбайлас жемқорлыққа қарсы күресушілер.
