Қоғам • 06 Қазан, 2020

Жастар ауылдық жерде жұмыс істесе...

314 рет
көрсетілді
3 мин
оқу үшін

Бүгінде ауылдық жерлерде бас қосқан жағдайда жиі еститініміз – мал бағатын, трактор айдайтын адамның аздығы. Бір жағынан жаздың ыстығы, күздің қара суығы тоқтаусыз трактор жүргізу де оңай емес. Оған қоса, ауылдағы техниканың дені ескі. Ауылдағы бұрыннан келе жатқан кәсіби механизаторлар ескі техниканы жамап-жасқаумен-ақ қартайғаны рас. Ауылдық жерде мал шаруашылығын қолға алған шаруа төрт түлігін бағатын малшы таппай бір әуреге түссе, қысқы жем-шөпті дайындау әрі тасымалдау үшін тракторшыны іздеп сабылып жүргені.

Жастар ауылдық жерде жұмыс істесе...

Жуырда аудан орталығында Дихан ауылдық округінің тұр­ғыны Шолпанғали Керімбеков ағамызбен әңгімелескенімде «кө­ше бойынан трактордың дауысы естілсе болды, осы тракторды бір жүргізсем деп тұрамын», деп бұ­рынғы рөлге отырған кезі ойы­на түсіп кететінін сағынышпен айтты. Өзі еңбек жолын «МТЗ-50» тракторынан бастап, ұзақ жылдай техниканың төресі К-701 тракторын айдағанын айтып, әрі К-701 тракторын жекеменшігіне алып, біраз жылдай осы тракторымен шаруашылықтардың (шаруашылық басшылары Жа­пар Дидарбеков, Сәтбай Әб­і­құ­лов, Файк Гаджиев, Мехия Рад­жамов) тапсырмасымен әрі ауыл тұрғындарының жерлерінде де үзбей еңбек етіп, халықтың ризашылығын алғанын еске алды. Жамбыл облыстық Каз­сель­хозхимия (басшысы А.Ка­рентаев) кәсіпорнында К-701 тракторын жүргізіп, Қордай, Меркі, Тұрар Рысқұлов, Жамбыл, Сарысу, Жуалы, Байзақ аудандарында және көрші Қырғыз Республикасы Талас облысының да жерлерін барлық талапқа сай жыртып, Көделі, қысқы Мо­йын­құм жайылымдарына да жемшөп тасып, жоғары еңбекақы алғанын және біраз Құрмет грамоталарымен марапатталғанын еске алды.

«Еңбегіне қарай – құр­мет, жасына қарай – ізет» дегендей, бүгінде бір кәсіпорында қа­ра­уылдық жұмысын абыроймен атқарып, бүгінгі жастарға ағалық ақылын үзбей айтып отырады. Алдағы жылы абыроймен зейнетке шықпақ ойы бар.

Бұрынғы Ленин колхо­зын­дағы МРСХО-да 1990-1993 жылдары бас инженер қыз­ме­тін атқарған, ауданның құр­метті ардагері, зейнеткер Серік Ешенбаев та шар­­уа­шы­лық­тағы тракторшылар Қал­ды­хан Дидарбеков, Тәттіқұл Ер­мұ­ратов, Шолпанғали Керім­бековтер уақытпен санаспай жұмысты артығымен орындайтынын жеткізді. Әсіресе барлық жұмысты мерзімінде тиімді ат­қарып, қоғамдық жұмыста да көзге түскен Шолпанғали Орал­бекұлы бүгінде жұбайы Қым­бат­күл екеуі 2 ұл, 1 қыздан 5 немере сүйіп отырған отбасы әрі халықтың ризашылығын алған ауылдың сыйлы азаматтарының бірі екенінін ерекше атап өтті.

Шолпанғали ағаның айтуынша, бүгінгі жастардың ауылдық жерде жұмыс істеуге ынтасы болса, жұмыс табылады. «Мал­шы, сушы, тракторшы сияқты жұ­мыстар жетерлік, қай жұмыс болса да жастар ауылдағы ха­лық­­тың құрметіне бөленсе» дейді.

 

Төле НАРЖАНОВ,

Аудандық тарихи-өлкетану музейінің қызметкері

 

Жамбыл облысы,

Байзақ ауданы