Үйдің ауласында ойнап жүрген топ баланың бірі байқамай беті ескі көрпемен жабылған, тереңдігі алты метрге жететін ашық құдыққа түсіп кетеді. Ата-анасы болған жайды баланың қасында жүрген әпкесінен біліпті. «Вова құлап кетті! Вова құлап кетті!» деп қайталай берген көрінеді. Құдықтың ішінен үздіге шыққан дауыстан баланың кептеліп қалғаны белгілі болады. Алайда ата-ана қанша жанталасқанымен баланы өз күшімен құтқара алмайды. Уақыт болса зымырап өтіп жатыр. Тек кешке қарай ғана өрт сөндіру бөліміне хабар беріп, кезекшіліктегі жігіттер дереу құтқаруға аттанады. Олар ауылға аудан орталығынан небәрі 20 минутта жетіп, жағдайды көзбен көрген соң тез арада шұңқырды қаза бастайды. Экскаватор мен кранды көмекке алдырады. Ұзақ уақыт бойы төзімділік танытқан балақайды батыр деп бағалап, Воваға жігер береді.
Сөйтіп шұңқыр да қазылады. Енді баланы шығару кезінде оның одан әрі түсіп кетпеуі үшін құдықтың нақты қай деңгейінде тұрғанын анықтау қажет болыпты. Өрт сөндірушілер шұңқырға түсіп, көзге көрінбейтін жерде арнайы құралмен тесік жасап, арматураны өткізеді. Болды! Тұрақтылық бар! Бөлімше командирі, азаматтық қорғау старшинасы Ержан Оспанов әріптестерінің көмегімен балаға көмек көрсету үшін құдыққа өзі түсіп, дереу балаға жармасады. Балақайды өзіне қысып ұстап алған соң өзге құтқарушылар екеуін жоғарыға көтере бастайды. Ауылдың барлық тұрғыны өрт сөндірушілер жүргізген осы құтқару операциясының куәгерлері болды.
Ерлік ескерусіз қалған жоқ. Елбасы Нұрсұлтан Назарбаевтың 2012 жылғы 5 желтоқсандағы Жарлығымен әскери және қызметтік борышын орындау кезінде көрсеткен ерлігі мен жанқиярлығы үшін Железин ауданын күзету бойынша №16 өрт сөндіру бекетінің азаматтық қорғау старшинасы Ержан Оспанов үшінші дәрежелі «Айбын» орденімен марапатталды.
Ержан Оспанов өзі құтқарған баламен күні бүгінге дейін араласып жүреді. Осы күні Владимир Штуц есімді әлгі балақай осы ауылдағы жалпы білім беретін орта мектептің 4-сыныбында оқиды. «Мен оны көрген сайын ішім жылиды. Оны өз ұлымдай көремін. 2012 жылы бәрі ойдағыдай өткеніне қуаныштымын», деп ағынан жарылды Е.Оспанов.
Айдана ЖАҚЫПОВА
Павлодар облысы
