Республикалық «Egemen Qazaqstan» газетінде жарияланған Нұрсұлтан Назарбаевтың «Абай аманаты» мақаласы Абайдың ұлылығын танытудағы тың бір соқпақ болғандығын айтар едім. Бұл орайда, Елбасының «Ұлы ақын, дана ойшыл Абай ХІХ және ХХ ғасырлар тоғысындағы ағартушылық немесе
ояну дәуірінің көшбасшысына, елдің болашақ бағдарын айқындап берген рухани темірқазығына айналды», деп Ұлы даланың ойшылы Абайға тереңінен баға береді. Адамзат өркениеті кез келген халықтың даналарын тарих сахнасына шығарып келгендігі және шығара берері де анық. Осы ойды біз Елбасының «Абай аманаты» мақаласынан жан-жақты тани түстік.
Тұңғыш Президентіміз бүгінгі және келер ұрпаққа Абайдың аманатын салиқалы оймен жеткізеді. Бұл орайда, Абай мұрасындағы халықтың мұң-мұқтажы, арман-қиялы Нұрсұлтан Назарбаевтың ой-мүддесімен сабақтасып жатқандығын аңғаруға болады. Өйткені Абай өз жұртының мүддесін ойлап, халқын жақсылыққа жетелесе, Қазақстанның Тұңғыш Президенті, Елбасы Нұрсұлтан Әбішұлы Назарбаев сол қалың жұртын тәуелсіздікке жеткізді. Қазақ елі тәуелсіздігінің аз ғана жылдарында Қазақстанды әлем таныған мемлекетке айналдырды. Бұл орайда, әлем Қазақстанды ең әуелі Назарбаевтың есімімен және ісімен танығандығын айтуға болады.
Дана Абай елінің бірлігін аңсады. Ел-жұртының білім мен ғылымды меңгеруін қалады. Алайда сол кездегі дәуір дүрмегі Абайдың бұл аңсар мұратына жеткізбеді. Сол халқы тәуелсіздіктің арқасында білімі мен ғылымы дамыған мемлекетке айналғандығын көзіміз көріп отыр. «Жасымда ғылым бар деп ескермедім, қолымды мезгілінен кеш сермедім» деген Абай өкінішінен Нұрсұлтан Назарбаев өзінің президенттік қызметі кезінде сабақ ала білді. Қазақстанның білімі мен ғылымын дамыту мәселесі Елбасының айрықша назарында болды. Ел тәуелсіздігінің алас-күлес кезеңдерінің өзінде Тұңғыш Президенттің бастамасымен «Болашақ» бағдарламасы ашылып, қазақтың ұл-қыздары әлемнің ең озық оқу орындарында білім алу мүмкіндігіне ие болды. Бұл көрегендік еді. Қазір сол «Болашақ» бағдарламасы бойынша шет мемлекеттерден білім алып келген жастар тәуелсіз Қазақстанның әр саласында абыройлы және жемісті еңбек етіп жүр.
Елбасы өз мақаласында Абайдың өмірі мен шығармасын тұтас қамтитын «Жидебай-Бөрілі» мемлекеттік тарихи-мәдени және әдеби мемориалдық қоры музейі құрылғандығын, ақшаңқан күмбезді Абай-Шәкәрім кесенесі тұрғызылғандығын жазады. Бұл сөз жоқ тәуелсіздіктің алғашқы жылдарындағы экономикалық қиыншылықтарға қарамастан жүзеге асырылған Абайдың мәңгілік ескерткішіне айналып, осы күндері халқымыздың және шетелдерден келіп жататын қонақтардың көңіл қуаныштарына айналды. Біз сол үшін де Елбасына ризашылығымызды білдіреміз.
Тәуелсіз Қазақстан ұрпақтары үшін Абайдың жолы еліміздің Тұңғыш Президенті Нұрсұлтан Назарбаевтың хакімді ұлықтау жолымен басталғандығын баса айтқым келеді. Енді міне, сол ұлы Абайдың 175 жылдығы елімізде кеңінен аталып отыр. Бұл орайда, Қазақстан Президенті Қасым-Жомарт Тоқаевтың дем беруімен Абай мұралары қайтадан жаңғырып жатыр. Ойшылы бар халықтың айбыны биік! Абайы бар халықтың мәртебесі жоғары.
Жабал ЕРҒАЛИЕВ,
жазушы, Қазақстанның еңбек сіңірген қайраткері, Сенаторлар кеңесінің мүшесі
Көкшетау
