Аймақтар • 12 Қазан, 2020

Ерегіскен екеу, егінсіз қалатын ел

615 рет
көрсетілді
4 мин
оқу үшін

Жуырда әлеуметтік желіде Қызылорда облысы Сырдария ауданы А.Тоқмағамбетов ауылындағы кәсіпкерлер дауы туралы ақпарат тарағанын білеміз. Осы ауылдағы «Азамат» шаруа қожалығының 105 гектар жерге егілген күрішті орып алуына кедергі келтіріп отырғандардың әрекеті көптің таңданысын туғызып, ел арасында осы оқиға жайлы әртүрлі пікір де естіліп қалып жатты.

Ерегіскен екеу, егінсіз қалатын ел

Өткен апта соңында өңірлік ком­муникациялар қызметінде Сырдария ауданының әкімі Талғат Дүйсебаев брифинг өткі­зіп, БАҚ өкілдеріне мәселенің жай-жапсарын айтып берді.

Ауылдағы тұрғындардың дені осы­дан 16 жыл бұрын құрыл­ған «А.Тоқмағамбетов» ЖШС құрамында екен. Серіктестік­тегі 875 тұрғын 2 мың гектар­дай егістік алқаптың 10% үле­сіне ие, негізгі 90 пайыздық үлес жалғыз азаматқа тиесілі. Ер­те көктемде осы құрылым иелі­гіндегі алқаптың 105 гектарына Азамат Ысқақов басшылық ете­тін «Азамат» шаруа қожалығы кү­ріш егеді. Бұған жер үлесіне ие ауыл тұрғындары қарсы шы­ғыпты. Кейіннен Азамат Ысқақовқа сол кездегі серіктестік төрағасы Меңдіғали Есжановтың құрылтайшыларға ескертпей, олардың келісімін алмастан рұқсат бергені белгілі болады. Құрылтайшының өкілі Мадияр Алдоңғаров бұл шешімді заңсыз деп тауып, маусым айында М.Есжановты қызметінен босатып жібереді. Екі шаруашылық арасында бұл туралы жасалған келісімде бір тараптың мөрі қойылмауы да істің дау-дамайсыз шешілуіне әжептәуір кедергі келтірсе керек. Осыдан да қазір «Азамат» шаруа қожалығы 105 гектар алқаптағы егінді жинап ала алмай отыр. Дәлірегі, алқаптың 70 гектары орылған, бірақ жиналмай жатыр. Ал атызда қалған күріштің өнімділігі күн сайын төмендей беретіні белгілі. 35 гектардай ал­қапқа әлі комбайн түспей тұр.

– Жалпы, бұл – екі кәсіпкер арасындағы дау. Бірақ мәселе ушығып бара жатқан соң жуыр­да алқаптың басына бардық. Проблема шешілмейінше егіс­тікке екі жақтан да комбайн кір­месін дедік. Екі тарапқа да қаты­сы жоқ шаруашылықтардың тех­­никасымен күрішті жинап алып, басқа қамбаға сақтай тұ­райық дегенді де ұсыныс ретінде айт­­тық. Оған екі жақ та көнбеді. Осы­­дан да орылған күріш әлі жи­нал­­май жатыр, – дейді аудан әкімі.

Кейіннен аудан әкімінің каби­нетінде жиын өтіп, үшжақты ке­лісім жасалыпты. Бірақ ертесі-ақ серіктестік пен шаруашылық басшылары келісімнен бас тартатынын хабарлаған.

Аудан басшысы кәсіпкерлер арасындағы бұл дау тек сот ар­­қы­лы шешілетінін айтып отыр. Бірақ ешқандай мәмілеге көн­­бей, өзара келісімге келмей отыр­ған екі тараптың әлі күнге сотқа жү­­гінбегені түсініксіз. Құ­рыл­тайшы өкілі Ысқақов пен Ес­жанов жұмсаған шығындары көрсетілген құжаттарды ұсынса, шы­ғындарын өтеп беруге де да­йын екен. Бірақ олар әзірге мұндай құжаттар ұсынбаған. 

Аудан әкіміне жуырда ауыл тұрғындарынан өкілдер ке­ліп, 3 мәселені шешіп беруін сұ­рапты. Оның екеуі осы мәселеге қатысты. Сондай-ақ олар келешекте «А.Тоқмағамбетов» ЖШС-мен жұмыс істеуден бас тартатындарын да жеткізіпті. Ауылдағылар басқа үлкен серіктестіктердің елдің әлеуметтік мәселесін шешуге үлес қосып келе жатқанын айтып, «А.Тоқмағамбетов» серік­тестігінің 16 жылдан бері мұндай іске ынта танытпай отырғанына наразылықтарын білдірген.

Аудан басшысының айтуын­ша, бұл мәселе егін жинау науқ­а­ны толықтай аяқталғаннан кейін жал­пы жиналыста талқыла­нады.

 

Қызылорда облысы