Аталған іс-шараға еліміздегі және шетелдердегі туберкулезге қарсы ұйымдардың, мемлекеттік органдардың басшылары, медицина саласының ғалымдары қатысты. Алдымен жаман тұмау жайлаған кезеңнің жай-жапсары қамтылған жинақтың тұсаукесері өтті. Бұдан әрі облыстық фтизиопульмонология орталығы мен көпсалалы облыстық ауруханада туберкулезге, онкологиялық патологияға және басқа да сырқаттарға қажетті хирургиялық көмек көрсету бойынша республиканың танымал хирургтерінің қатысуымен шеберлік сабағы ұйымдастырылды.
COVID-19 пандемиясының алғашқы толқынынан қорытынды шығарып, өткенге көз жүгіртетін, медициналық көмекті жақсартудың қосымша шараларын анықтайтын уақыт келді. Пандемия күшейген кезеңде туберкулезге қарсы көмек, сонымен қатар эпидемиялық жағдайдың кез келген қиындықтары туындауы әбден мүмкін.
Конференция барысында Ұлттық фтизиопульмонология ғылыми орталығының директоры, медицина ғылымдарының докторы Мәлік Әденов еліміздегі жағдай туралы егжей-тегжейлі айтып берді. Ақмола облысы бойынша тауарлар мен көрсетілетін қызметтердің сапасы мен қауіпсіздігін бақылау департаментінің басшысы Айнагүл Мусина қазіргі қауіп-қатерлер кезіндегі санитарлық-эпидемиялық қызмет жұмысының мәселелеріне тоқталды. Сондай-ақ коронавирус жұқпасымен күресте денсаулық сақтау ұйымдарының қызметкерлерін қаржылық қолдау шаралары мен індет кезінде қылмыстық-атқару жүйесі департаментінің мекемелерінде эпидемияға қарсы іс-шараларды ұйымдастыру жұмыстары да ұмыт қалған жоқ.
Сонымен қатар ғылыми-практикалық конференцияның пленарлық бөлімі өтті. Онда Беларусь, Украина, Молдова, Өзбекстан, Қырғызстан, Түркия елдерінен және Ресейдің Санкт-Петербург, Архангельск, Омск қалаларынан келген медицина ғылымдарының докторлары, белгілі хирург дәрігерлер баяндама жасады. Пленарлық бөлімде жаман тұмауға байланысты алғашқы кезеңде орын алған кемшіліктерді жою мәселелері мұқият сарапқа салынды. Өткеннен сабақ алып, алдағы уақытта қолбайлау болған кейбір мәселелерді шешу жайы қарастырылды.
Көкшетау
