Департамент бастығы Ернұр Өтегенов өртке алдымен екінші дәрежелі қауіптілік деңгейі беріліп, кейін үшінші деңгейге ауыстырылғанын мәлім етті. Бұған өрттің кеш анықталғаны себеп болған.
– Сауда үйіндегі өрт туралы хабарлама ТЖД-ның бірыңғай диспетчерлік қызметінің пультіне 11 қазанда түнгі сағат 01.00-де келіп түскен. Өрттің жалпы ауданы 1 500 шаршы метрді құрап, ғимараттың бірінші және екінші қабаттарында орын алды. Сауда үйі ғимаратының жалпы ауданы – 7 273 шаршы метр, сауда алаңдарының аумағы – 3 929,4 шаршы метр, – деді Е.Өтегенов.
Өрт кезінде бутиктер, кеңсе бөлмелері мен шатыр жанған. №1 мамандандырылған өрт сөндіру бөлімі, №3 және №4 өрт сөндіру бөлімдерінің күштерімен өрт сағат 04.55-те сөндірілді.
Оқиға орнында облыстық ТЖД өрт сөндіру қызметінің 63 қызметкері мен 12 техника жұмыс істеді. Оларға «Павлодар-Водоканал» ЖШС тарапынан қаланың коммуналдық қызметтері жәрдемдесті.
Полиция бөлімінің қызметкерлері қоғамдық тәртіпті сақтау үшін кезекшілікті ұйымдастырды. Қазіргі уақытта өрттің себебін анықтау бойынша жұмыс жүргізілуде.
Павлодар
