Жуырда облыс әкімі Гүлшара Әбдіқалықованың төрағалығымен өткен өңірдің 2021-2023 жылдарға арналған экономикалық және бюджеттік саясат мәселелері жөніндегі кеңесте де осы мәселе талқыланып, алдағы негізгі міндеттер айқындалды.
– Таяудағы бірнеше жыл ішінде індеттің қоғамның барлық салаларына, экономика мен бизнеске әсер ететін салдарымен бетпе-бет кездесеміз. Сондықтан бүгінгі таңда мемлекеттік бюджеттік жоспарлаудың барынша тиімді саясатын қамтамасыз ету бұрынғыдан да маңызды, – деді облыс әкімі.
Бір айта кетерлігі, келер жылға арналған бюджет жобасы ешқандай қарызсыз бекітілетін болады. Бұл үшін 27,6 млрд теңге қаралып отыр, оны барлық өтпелі инвестициялық жобаларды аяқтауға, республикалық бюджеттен іске асырылатын жобаларды қоса қаржыландыруға, облигациялық бағалы қағаздарды шығаруға бағыттау көзделуде.
Облыста қызмет түрлері бойынша сараланатын агломерациялық тәсіл негізінде 2023 жылға дейінгі экономикалық даму жоспары әзірленді. Жоспар аясында бизнеске 270 млрд теңгеден асатын 265 жобаны іске асыру ұсынылған. Бүгінде оның 59-ы іске асырылды, 50-ге жуығы жұмыс үстінде.
Облыс әкімі мемлекеттік бағдарламалардың мүмкіндіктерін тиімді пайдалану маңызды екенін де атап өтті. Бұл ретте мемлекеттік қолдауды шығынсыз, бәсекеге қабілетті және технологиялық жобаларға, бизнесті қайта өңдеуге бағыттап, өнімді өткізудің нарықтарын жолға қою қажет. Әсіресе өңір басшысы аймақтың азық-түлікпен және ең қажетті тауарлармен өзін-өзі қамтамасыз етуіне баса назар аудару қажеттігін айтты.
Аймақтың ресурстық әлеуетін, мемлекеттік бағдарламалардың кешенді құралдарын тиімді пайдалану арқылы бәсекеге қабілетті экспортқа бағдарланған өндірістерді дамытуға баса назар аудара отырып, өңірді индустрияландыру жалғасады. Ірі өндірістердің айналасында ілеспе бизнес құру мүмкіндігі де ұдайы назарда болады.
Экономикалық саясаттың басты басымдықтарының бірі – өсімдік шаруашылығы мен жайылымдағы мал шаруашылығын дамыту.
Мамандар дерегінше, бүгінде облыста пайдаланылмай жатқан жайылымдық алқап көп, оның басым бөлігінде жайылымдық мал шаруашылығын дамыту үшін талап етілетін 2500-ге жуық құдық, ұңғыма және басқа да сумен жабдықтау көздері бар. Кеңесте облыс басшысы жайылымдардағы ұңғымалар мен құдықтарды қалпына келтіру мәселесін толық шешуді тапсырды. Бұл мал мен мал шаруашылығы өнімдерінің санын едәуір арттырып, азық-түлік қауіпсіздігін қамтамасыз етудің және жұмыс орындарын құрудың мүмкіндігі.
Биыл дария деңгейі төмендеп, күріш алқаптары судан қала жаздады. Осыған дейін де байқалып келген бұл мәселенің осыншалықты ушығуы осы бағытта кешенді шаралар қабылдау керектігін көрсетіп отыр. Облыс басшысы қазір жоба деңгейінде тұрған бірқатар су қоймаларын салу мәселесін пысықтаумен қатар, ауыл шаруашылығы өндірісін, әсіресе егіншілікті әртараптандыру бойынша ғылыми негізделген ұсыныстар енгізу қажеттігін қадап айтты.
Қазір аймақта балық шаруашылығын дамыту жөніндегі өңірлік бағдарламаның жобасын әзірлеу аяқталып қалды. Оны жүзеге асыру үшін Г.Әбдіқалықова келер жылға арналған облыстық бюджетте 1 млрд теңге қарастыруды тапсырды. 2030 жылға дейін жабық сумен жабдықтау жүйесінде 55 көл-тауарлы балық шаруашылығын, 9 тоған, 3 акваөсіру өндірісін құру жоспарлануда.
Бүгінде цифрлы даму кез келген өңірдің көрсеткішін бағалау критерийлерінің біріне айналды. Осы жылдың алғашқы 6 айының қорытындысымен Қызылорда облысы еліміздегі ақылды қалалардың эталондық стандартының талаптарына сәйкес 5-орынға ие болды. Кеңесте облыс әкімі 2021 жылдың 1 тоқсанынан кешіктірмей цифрландыруды дамытудың өңірлік стратегиясын әзірлеуді тапсырды.
Барлық сала сараланаған кеңесте аймақ басшысы алдағы 3 жылда халықтың қауіпсіз және жайлы өмір сүруі бойынша іс-шараларды жүзеге асыру керектігін міндеттеді.
– Өңірде ықтимал су тасқынына қарсы, сондай-ақ төтенше жағдайлардың алдын алу және оларды жою жөніндегі іс-шараларға дайындау жөніндегі іс-қимыл алгоритмі әзірленуі тиіс, – деді Гүлшара Наушақызы.
Жаңа заман жаңа мамандықтарды талап етуде. Алдағы уақытта оқу орындары қандай кәсіп иелеріне қажеттіліктер туындайтынын және олардың белгілі бір уақыт аясында қалай өзгеретінін болжап қана қоймай, ұдайы талдап отыруы керек. Бұл да өңір басшысы қойған міндеттердің бірі.
Кеңесте пандемия кезіндегі қиындықтар қайталанбауы үшін өңірдің дәрі-дәрмектермен, төсек-орындармен қамтамасыз етілуін, медициналық қызметкерлердің толық, ғимараттардың дайын болуын егжей-тегжейлі зерделеу тапсырылды. Денсаулық сақтау саласының инфрақұрылымын дамыту мәселесі де ұмыт қалған жоқ. Осы күні облыс аудандары үшін орталық ауруханалар салу мәселесі толығымен шешілді. Жалағаш ауданында салынып жатқан құрылыс жыл соңына дейін аяқталады.
Өңір басшысы сондай-ақ әлеуметтік қорғау саласын дамыту жөнінде бірқатар тапсырма берді. Қызылорда қаласында тиімді жүзеге асырылып жатқан «Бақытты отбасы» жобасын облыстың барлық аудандары мен Байқоңыр қаласында енгізген жөн.
– Біз әлеуметтік қызмет көрсетуді берілген өтінішпен емес, зерттеу жұмыстары арқылы анықтауымыз керек. Шын мұқтаж жандар назардан тыс қалмауы тиіс, – деді облыс әкімі.
Кеңес соңында Г.Әбдіқалықова бюджет қаражатының тиімді әрі мақсатты пайдаланылуын қамтамасыз етуді, сондай-ақ қаржылық тәртіпті қатаң сақтауды тапсырды.
ҚЫЗЫЛОРДА
