Отанымызда да, шетелдерде де Алан Бөрібаевты ең биік деңгейдегі маэстро ретінде таниды. Оның дирижер тұғырындағы өзгеше өнері төрткүл дүниені әлдеқашан таңдай қаққызып үлгерген. Енді міне, соңғы екі жылда жұртшылық талқысына жүйелі түрде ұсынып келе жатқан әлемдік музыкалық қауымдастық арасында резонанс тудыратын бірегей авторлық жобалары да дирижерді жаңа қырынан танытты десек, артық айтқандық емес. Олардың ішінде Қазақстан, Италия және басқа елдерден келген мыңнан астам музыканттардың орындауындағы Густав Малердің №8 симфониясы, Карл Дженкинстің SHINE ASTANA салтанатты одасы бар. Жылдың басында қойылған «Италиядан келген хаттар» опералық-симфониялық концерті тыңдармандардың ыстық ықыласына бөленіп, жүректерінен орын алды. Асқақ өнердің жанкүйерлері маэстродан шығармашылық тартулардың жалғасын асыға күтті. Қалың тыңдарманның тілегі һәм қуанышына орай, 17 және 18 қазан күндері «Астана Опера» сахнасында өткен «Мольер, Вольтер және Бомарше немесе Француз комедиясының негізін салушылар» атты тартымды бағдарлама сол үдеден толық шықты.
Жобаның өзгешелігі – концертте Жан-Батист Мольердің «Мещанин во дворянстве» комедиясының еркін оқылуында, маэстроның өзі жасаған монолог нұсқасы Рихард Штраустың осы комедияға арнап жазған музыкасынан сюитамен бірге шырқалды. Әр жылдары аталған пьесадағы музыкалық және драмалық бастауларды үйлестіру тұжырымдамасын маэстро А.Бөрібаев Балтимор (АҚШ), Дублин (Ирландия), Майнингенде (Германия) ұсынып, өнерсүйер қауымның зор қызығушылығын тудырған болатын.
Музыкалық монологтың негізгі қаһарманы Мольердің кейіпкері Журден мырза екенін атап өткен жөн, Алан Бөрібаев оны күлкілі, сүйкімді, сөйте тұра аңқылдақ әрі паң мінезді адам ретінде көрген. Бас кейіпкердің тұла бойы балалық білімқұмарлық пен балаға тән ғашық болғыштық қасиеттерге толы. Маэстро Журденнің зиялы орталарда танылуға деген тоқтамсыз құмарлығын көрсетудегі Мольердің қолтаңбасын сақтап қалған. Барлық оқиға осының айналасында өрбиді. Журден мырзаны оркестр музыканты Әсет Нелдібаев сомдады.
Музыкалық кешті француз комедиясының алтын ғасырының классиктері Мольер, Вольтер және Бомаршенің мәтіндеріне жазылған шығармалар ұсынылған мазмұнды бағдарлама жалғастырды. Сонымен қатар талғампаз жұртшылық назарына Вольтер, Л.Бернстайн, П.Бомарше, В.Моцарт, Мольер, Р.Штраустың өмірі мен шығармашылығы туралы очерктер ұсынылды. Әдеби арқау концерттің музыкалық мазмұнын әсемдікпен көмкерді. «Астана Опера» сахнасында алғаш рет концерттік бағдарлама аясында В.Моцарттың «Фигароның үйлену тойы» операсынан екінші бөлімнің финалы орындалғанын атап өту керек.
Кешке Қазақстанның еңбек сіңірген қайраткерлері Талғат Мұсабаев, Айгүл Ниязова, Башқұртстан Республикасының еңбек сіңірген әртісі Әльфия Кәрімова, «Құрмет» орденінің лауреты Айзада Қапонова, халықаралық байқаулардың лауреаттары Талғат Ғалеев, Евгений Чайников, Гүлжанат Сапақова, Ержан Сайыпов, Шыңғыс Расылхан, Ерұлан Кәмел және тағы да басқа өнер майталмандары қатысты. Концерттің режиссері – Еренбақ Тойкенов.
