Сыбайлас жемқорлыққа қарсы қызметтің Нұр-Сұлтан қалалық департаментінің жетекшісі Жазира Жылқышиеваның айтуынша, бүгінгі таңда 3 кодекс пен 10 заңға өзгеріс енгізілген.
«Жемқорлыққа қарсы заңнамада маңызды нормалар қабылданды. Бірінші басшылардың жемқорлық туралы ескертпегені үшін жауапкершілігі күшейді. Бұл үшін тәртіптік жауапкершілік қарастырылған. Тұрақты түрде қызметкерлерге түсіндіру лекциялары мен семинарлар өткізіп тұру керек. Бұдан бөлек, жемқорлық тәуекелдері бойынша сараптамалар жүргізу қажет. Бұл профилактика үшін өте маңызды», деп атап өтті Жазира Жылқышиева.
Оның айтуынша, жемқорлық шектеулерін қабылдаған тұлғаларға сыйлық алуға толық тыйым салынған. Спикер жемқорлық құқықбұзушылыққа жауапты тұлғалардың саны көбейгенін де жеткізді. Енді оған бірінші басшылардан бөлек, мемлекеттік сатып алуға жауапты құрылымдық бөлімшелердің жетекшілері де кіреді.
«Қазсушар» РМК бас директоры жиын барысында кәсіпорында жемқорлық профилактикасы бойынша өткізіліп жатқан жұмыстар туралы хабардар етті.
«Біздің кәсіпорынның қызмет аясы интенсивті және олар кең саланы қамтиды. Бүгінгі кездесуге ел аумағындағы барлық қызметкерлерімізді қатыстырып отырмыз. Себебі бұл шараны өте маңызды деп білеміз. Жемқорлыққа қарсы заңның жаңарған нормаларын бәрі білуі тиіс деп есептейміз. Біз профилактикалық шараларды күнделікті қабылдаймыз, аталған нормалардың орындалуын қатаң қадағалаймыз. Жалпы айтқанда, бұл бағыттағы жұмыс күшейеді», деді А.Қасенов.
Оның пікірінше, аталған жұмысқа кәсіпорындағы ашықтықты қамтамасыз етіп, жемқорлыққа қарсы мәдениетті қалыптастыратын «Адалдық алаңы» жобалық кеңсесі оң әсерін тигізеді. Іс-шара соңында Жазира Жылқышиева барлық қатысушыларға алғыс білдіріп, жемқорлыққа қарсы күресте оң нәтижеге тек бірлесіп күш салғанда ғана жетуге болатынын атап өтті.
