Қоғам • 20 Қазан, 2020

Апатты жатақханадан – жаңа баспанаға

242 рет
көрсетілді
4 мин
оқу үшін

Атырау қаласының тұрғын үй қорында апатты үйлер аз емес. Қала әкімі Қайрат Оразбаевтың мәліметіне сүйенсек, жыл басында осындай баспаналар саны 78-ді құрапты. Оның ішінде 10 жатақхана да бар. Кейін сарапшылар жасаған қорытындыға сәйкес апатты тұрғын үйлердің қатары тағы екі нысанмен толыққан.

Апатты жатақханадан – жаңа баспанаға

– Қалалық әкімдіктің бас­ты мақсатының бірі – апатты үйлердің тұрғындарын жайлы әрі жаңа мекенге көшіру. Ең бастысы, тұрғындардың әлеуметтік тұрмысын жақ­сартып, жайлы орта қа­лып­тастыруды қолға алып отырмыз. Сол себептен жаңа бас­панаға көп жыл бойы кезегін күткен азаматтар қол жеткізіп, жүздеген отбасының өмір сүру сапасы жақсаруда, – дейді қала әкімі Қ.Оразбаев.

Шаһар басшысының ай­туынша, биыл жыл басынан бері қаладағы 5 көп қабатты үй мен 4 жатақхананың тұр­ғындары жайлы пәтерлерге қоныстанды. Осы мақсат үшін тұрғын қорынан 410 пәтер бө­лінді. Енді жыл соңына дейін тағы 4 жатақхананың тұрғындарын жаңа баспанамен қамтуға тағы 403 пәтер бөлу жос­парланып отыр.

– Мұндай бағдарлама келесі жылы да жалғасын табады. Өйткені бұл – қалада күрмеулі мәселеге айналған апатты үйлер тұрғындарының жағдайын жақ­сар­туға бағытталған мемле­кет­тік қолдау шаралары, – дейді Қ.Оразбаев. – Ескі үйлерді бұзу бағдарламасымен бірге, сол аумақтарға инвесторлар тарту арқылы қолданыстағы инфрақұрылымды пайдалана отырып, шығындарды үнемдеу есебінен сапалы тұрғын үй қорын қалыптастырып, халыққа ұсыну жұмыстары жүргізілетін болады.

Жақында «Нұрсая» шағын ауданында пайдалануға беріл­ген жаңа үйде 240 пәтер бар. Оған алдымен Гагарин көшесіндегі апатты жатақхана тұрғындары көшірілді. Апатты жатақханадан жайлы пәтерге көшкен Танзиля Ғилажева: «Бұған дейінгі көрген қиын­дықтың бәрін ұмытатын бол­дық» деп қуанса, көпбалалы ана Жұмагүл Айтуарова: «Бас­па­наға ие болып, бақыттан басым айналып тұр» деп қуа­ны­шын жасыра алмады.

Мұнайлы өңір орталығында жаңадан бой көтерген шағын ауданның қатарында «Береке» де бар. Мұнда «Нұрлы жер» бағдарламасымен бірнеше тұрғын үй бой көтерді. Жа­қын­да халықтың әлеуметтік тұр­мысы төмен топтарына ар­нал­ған 72 пәтері бар 9 қа­бат­ты үй пайдалануға берілді. Атырау қалалық тұрғын үй-ком­муналдық шаруашылығы, жолаушылар көлігі және авто­көлік жолдары бөлімінің сектор меңгерушісі Рафхат Жолдиевтің айтуынша, қазір тұрғын үй кезегінде 21 мың адам тұр. Ал мемлекеттік тұрғын үй бағ­дар­лама­сымен берілген жал­­дамалы пәтерлердің құны қымбат емес.

– Екі бөлмелі баспана алған тұрғындар айына 7-8 мың теңгеден төлейді. Жыл ая­ғына дейін тағы да осындай төрт үй пайдалануға беріледі. Сол үйлерден тағы да 300-ге жуық отбасының жаңа баспана алатыны жоспарланып отыр. Жалпы, жыл басынан бері 291 адамға пәтер берілді, – дейді Р.Жолдиев.

Жаңа баспана алу бақытына бөленгендердің қатарындағы Маржан Бурабаеваның қуаны­шында шек жоқ. Өйткені ол отбасымен бірге пәтер жалда­ғанына 13 жыл болыпты.

– Біреудің пәтерін жал­дау­дың машақаты көп. Бір күні «Суды көп пайдаланба, электр энергиясының ақшасы көбейіп кетті, пәтерімді босат» деуі мүмкін. Мұндай сөздерді естісек те, соған шыдап келдік. Өйткені өзіміздің басыбайлы баспанамыз болмады. Біз аз қамтылған отбасылардың санатындамыз. Сондықтан 2008 жылы тұрғын үй кезегіне тіркелдік. Енді міне, екі бөлмелі пәтерге ие болдық. Отбасымызбен бірге қуанып та, толқып та тұрмын. Пәтер бөлмелері кең әрі жарық. Жеделсаты жұмыс істеп тұр, – дейді баспана тауқыметін тартқан Маржан Бурабаева.

 

Атырау облысы