Өткен аптадан бастап әлеуметтік жәрмеңке қайтадан жалғасты. Фермерлер 190 тоннадан аса өнім әкелген. Сиыр етінің килосы 1 200-ден 1 500 теңгеге дейін, қой еті – 1 300-1 500, жылқы еті 1 500-1 800, картоп килосына 65 теңгені құрады. Ірі сүт фермалары сүтінің литрі – 130 теңгеден. Аққулы қарбызының килосы 100 теңгеден сатылды.
Бұған дейін тұрғындар асыға күтетін әр сенбі сайын өтетін әлеуметтік ауылшаруашылық жәрмеңкесі індеттің таралуы кезінде тоқтап қалған болатын. Облыстың барлық аудандарының фермерлері өз өнімдерін «Квазар» сауда үйіне қарама-қарсы тұрған кең алаңға әкеледі.
Тіпті қалалықтар жәрмеңкенің ашылуын таңғы сағат 6-дан бастап күткен екен. Жәрмеңкеде төмен бағамен ет, шұжық, ірімшік, сүт, сүзбе, жұмыртқа, май, бал, көкөністер және басқа да өнімдер сатып алу мүмкіндігіне ие.
Ал облыстық кәсіпкерлік және сауда басқармасының мәліметінше, осы күндері өңірдегі барлық әлеуметтік дүкенге 115 ауыл шаруашылығы өндірушілері әлеуметтік маңызы бар азық-түлік тауарларын жеткізуде.
Өндірушілер жеткізетін азық-түлік тауарлары, көкөністер, картоптың бағалары нарықтағы бағадан 10-15 пайызға арзан. Облыс әкімдігінде өңірдегі ірі картоп өсірушілермен меморандум жасалды. Енді фермерлер картоптың 15 пайызын белгіленген бағамен өңір тұрғындарының алдағы қыс пен көктемдегі қажеттіліктері үшін сақтайды.
Ауылшаруашылық басқармасының мәліметінше, өткен жылы өңірде 512 мың тонна картоп алынса, қазіргі өнім молырақ, 564 мың тоннаға жеткен. Бұл өңірдің өнімге деген қажеттілігінен едәуір асып түседі.
Екіншіден, өңірдегі ауыл шаруашылығы тауарларын өндіруші серіктестіктермен, шағын шаруа қожалықтарымен «Өндірушіден сөреге дейін» қағидатына сәйкес бірнеше меморандум да жасалды. Меморандум барысында азық-түлік тауарларының 16 түріне бірінші сұрыпты ұн, күріш, қарақұмық, кеспе, сарымай, нан, айран, сүт, сүзбе, тауық еті, бірінші санатты жұмыртқа, тұз, картоп, пияз, сәбіз, қырыққабат енген. Яғни меморандумда бекітілген осы азық-түлік делдалсыз өндірушіден тікелей сөреге жеткізіледі.
Басқарманың мәліметінше, қазір облыста азық-түліктің тұрақтандыру қорын толықтыру белсенді жүргізілуде. Жыл басынан бері тұрақтандыру қорына 5,3 мың тонна өнім сатып алынды. Бүгінде өнімдердің 4,4 мың тоннадан астамы сатылды. Тұрақтандыру қорын қалыптастыру жүйесі үздіксіз жүргізіледі. Қараша айының соңына дейін қордың көлемін 4 мың тоннаға дейін жеткізу жоспарланып отыр.
Ал тұрақтандыру қорының өнімдері 176 әлеуметтік дүкенде сатылады. Мысалы, облыс бойынша iNMart желісінің барлық 24 супермаркетінде әлеуметтік маңызы бар азық-түлік тауарларының 16 түрінің бағасын көтермеу міндеттелді.
Азық-түлік бағаларын тұрақты ұстап тұру туралы «Павлодар» Әлеуметтік-кәсіпкерлік корпорациясы мен «Низкоцен» ЖШС (iNMart сауда желісі) арасында келісім жасалған.
– Осы мақсатты жүзеге асыру үшін компанияның сауда айналымына 50 млн теңге бөлу қарастырылған. Бұған дейін де «Қызылжар Құс» ЖШС тауық етін дүкендерге тұрақты бағамен жеткізуге міндеттеліп, сол үшін 150 млн теңге бөлінген болатын, – дейді басқарма өкілдері.
Ал 21 қазандағы статистикалық деректерге сәйкес, облысымызда 13 түрлі әлеуметтік маңызды азық-түлік өнімінің құны республика бойынша қалыптасқан орташа бағадан төмен. Оның ішінде бірінші сұрыпты ұн, пастерленген сүт, айран, сүзбе, сарымай, картоп, сәбіз, қарақұмық жармасы, сиыр еті (жауырын-төс бөлігі), тауық етінің бөліктері, 1-санатты жұмыртқа, күнбағыс майы, құмшекер бағалары төмен азық-түлік бестігіне енген.
Өңірде азық-түлік бағалары бойынша жағдай облыстық, қалалық, аудандық әкімдік тарапынан үнемі бақылауға алынған. Әлеуметтік маңызы бар азық-түлік тауарларының құнын көтеру фактілері анықталған жағдайда тұрғындар жедел желіге хабарласуға болады.
Павлодар облысы
