Көктайғақ келіп көлік апаты да жиілеп жатыр

Аймақтар • 27 Қазан, 2020

Солтүстік Қазақстанда көктайғақтан көлік апаты жиіледі

33 рет көрсетілді

Қар білініп, көктайғақ басталғалы солтүстікқазақстандық патрульдік полиция батальонының жұмысы арта түсуде. Өйткені, машиналардың жолдан тайып кетуі жиілеп, апатты жағдайлар артып жатыр, - деп жазады Egemen.kz

Жақсыбай САМРАТ

Мәселен, өткен демалыс күндері сондай бірнеше оқиға болды. Соның бірі Омбы-Петропавл тасжолымен келе жатқан жолаушылардың басында болған. Бұл жайлы жолаушы Инстаграмм парақшасында былай деп жазған: "Түнгі сағат 1 шамасында Омбы тасжолымен Петропавлға қарай бет түзеген болатынбыз. Боран басталып, жолдың беті көктайғаққа айналды, бауырым екеуміз мінген көлік көктайғақтың кесірінен жолдан кюветке түсіп кетті. Көмекке полицияны шақырған едік. Олар дер кезінде жетіп, көмек қолын созды. Жедел әрекет етіп, жолға алып шыққан ЖПҚ қызметкерлеріне алғыс білдіргіміз келеді. Жігіттерге үлкен рақмет. Патрульдік машинаның нөмірі 0054", - делінген онда.

Ал Есіл ауданында КАМАЗ-дың жүргізушісі көктайғақ жолмен алыса отырып, денсаулығының нашарлауына байланысты көлігін тоқтатуға мәжбүр болған. Ол да полицияның дабыл қабылдайтын нөміріне хабарласып, өзіне көмек сұраған. Жедел келген патрульдік полицияның қызметкерлері Нұрсұлтан Аушахманов пен Қайсар Мұқанов сырқаттанған жүргізушіні ауруханаға жеткізген. Бұған науқастанып қалған жүргізуші жұмыс істейтін "Петропавл-жолдары" ЖШС Есіл өндірістік жол учаскесінің бастығы СҚО Полиция департаментіне жүгініп, көрсеткен көмегі үшін алғысын білдірді.

Ал кеше Петропавл қаласының бір тұрғыны таңғы мезгілде келеңсіз жағдайға тап болды. Ол көктайғақтың кесірінен машинасын сөндіріп алып, жолдың ортасына тұрып қалған. «Амалым таусылған мен жолдың ортасында жол-жөнекей көліктерге кедергі келтірдім», - дейді көлігі Жамбыл мен Челюскин көшелерінің қиылысында машинасы от алмай қалған Бақытжан Жақыпова.

Басқа шарасы болмаған соң ол да полицияға хабарласуға мәжбүр болған. Сөйтіп 20 минуттай жолда тұрған әйелге полицейлер көмекке келген. Патрульдік полиция батальонының қызметкерлері Данияр Өтегенов пен Жамбыл Қалиев көлікті тіркеуге алып, техникалық қызмет көрсету станциясына жеткізген. «Өзгенің басында орын алған жағдайға бей-жай қарамай, көмек қолын созған тәртіп сақшыларына алғыс білдіремін», - деп жазған әйел.

Көктайғақтың кесірі қыс бойы залалын тигізері анық. Сондықтан патрульдік полиция жүргізушілерге дер кезінде қыстық дөңгелектерін салып, сақтық шараларын жіті сақтауды ескертеді.

Солтүстік Қазақстан облысы

Күннің маңызды және өзекті жаңалықтарын «Егемен Қазақстан» телеграм каналынан оқыңыз