Қазақстан Президенті жанындағы Орталық коммуникациялар қызметінде Қазақстан халқы Ассамблеясы атынан сайланған Мәжіліс депутаттары Егорь Каппель, Роман Ким, Ахмет Мұрадов, Надежда Нестерова және Розақұл Халмұрадов қатысқан брифингте Мәжілістегі ҚХА депутаттық тобының жұмысы жан-жақты таныстырылды.
Қазақстан Президенті жанындағы Орталық коммуникациялар қызметінде Қазақстан халқы Ассамблеясы атынан сайланған Мәжіліс депутаттары Егорь Каппель, Роман Ким, Ахмет Мұрадов, Надежда Нестерова және Розақұл Халмұрадов қатысқан брифингте Мәжілістегі ҚХА депутаттық тобының жұмысы жан-жақты таныстырылды.
ҚХА атынан сайланған Мәжілістегі депутаттық топтың құрамына үш саяси партияның өкілі болып табылатын және Мәжілістің жеті комитетінде жұмыс істейтін 12 депутат кіреді. Аталған депутаттық топ туралы бекітілген ереже және жұмыс жоспары бар. Мәжілістің Экология мәселелері және табиғатты пайдалану комитетінің мүшесі Егорь Каппель аталған депутаттық топ жұмысын кеңінен әңгімеледі. Оның айтуынша, көппартиялы Парламентте ҚХА депутаттық тобы партияаралық достастықтың үнқатысу алаңы қызметінің көптүрлі әдіс-тәсілдерін қолданады. «Біздің үнқатысу алаңымызда әлеуметтік маңызды мәселелер, атап айтқанда, азық-түлік тауарларының шекті бағаларынан бастап ауылдық аумақтарды дамытудың мемлекеттік бағдарламаларына дейінгі барлық дерлік мәселелер талқыланады», деді депутат өз сөзінде.
Е.Каппель бұл ретте саяси бәсекелестік бар екенін, бірақ та ол тәуелсіздік, ұлттық бірлік, бейбітшілік және келісім сияқты негізгі мәселелер бойынша жалпыұлттық консенсусты жоққа шығармайды дегенді де ерекше атап кетті. Депутаттық топ партияаралық ынтымақтастық функциясын атқарады, бұл мәселелер бойынша іс-шаралардың арнайы қоғамдық-саяси жоспары жасалған. Ондағы басты мақсат қоғамдық-саяси тұрақтылықты, қоғамдық-ұлттық келісімді заңнамалық қамтамасыз ету және тәуелсіздікті нығайту болып табылады. Мемлекет басшысы атап көрсеткендей, Ассамблея – жалпыхалықтық өкілдік, яғни азаматтық, жалпыхалықтық институт, деді ол.
Депутат мемлекеттік мәдениет қазақ мәдениеті болып табылатынын, ал оның айналасына 130-дан астам этнос өкілдерінің мәдениеттері шоғырлануы қажеттігін атап өтті. Мәдениеттер жойылып кетпейді, қайта бір-бірін дамытып отырады. Мемлекет басшысы, Қазақстан халқы Ассамблеясының Төрағасы Нұрсұлтан Назарбаев атап көрсеткен және Ассамблея депутаттары қолдаған «алтын ереже» туралы да айтылмай қалмады. «Тағдырдың жазуымен біздің елімізде 130 ұлт пен ұлыстың өкілдері тұрып жатыр. Қазақстан халқы Ассамблеясының атынан 9 депутат осы ұлттардың өкілдері ретінде сайланды. Және о баста нақты айтылғандай, біздің ешқайсымыздың бір ғана этностың атынан ғана сөйлеуімізге құқығымыз жоқ. Біз осы «алтын ережені» ұстанамыз, осы ережеге бағынамыз», деді Е.Каппель.
Мәжілістің жоғарыда аталған комитетінің мүшесі Ахмет Мұрадов Қазақстан халқы Ассамблеясы бұрынғы кеңестік кеңістікте және басқа мемлекеттерде жұмыс істейтін басқа Ассамблеяларға қарағанда бірегей екенін ерекше атады. Құрылымы қоғамдық-халықтық екенін, ал оны Қазақстан Президенті басқаратынын тілге тиек еткен депутат осының өзі Ассамблея мәртебесіне халықаралық деңгейде қызығушылық танытылып отырғанына назар аударды. «Бізге еліміздің барлық өңірлерінен өтініштер келіп түседі, ұлтына, ұлысына қарамастан, барша азаматтар арыз-шағымдарын айтып жатады. Яғни, байланыс бар деген сөз. Олар біздің Парламент отырысында атқарушы органдарға сауал салуымызға негіз болады», деді Ахмет Сейдарахманұлы.
Сондай-ақ, Мәжілістің Аграрлық мәселелер комитетінің мүшесі Розақұл Халмұрадов қазақ жерін мекен еткен этнос өкілдері татулығының сырын былайша сипаттап берді: «Бұл сыр қазақ халқының кеңпейілдігі мен қонақжайлығында, табиғи болмысы мен бітімгершілік жаратылысында жатыр», деді ол. Қазақ халқының басынан өткерген қиындықтарын санамалап берген депутат солардың барлығын этнос өкілдері білетіндігін алға тартты. «Сол себептен өз тағдырын қазақ халқымен бірге байланыстырған этнос өкілдеріне ең керектісі еліміздің бірлігі, қоғамдық келісім, тұрақтылық және татулық. Сол болатын болса, Елбасының «Қазақстан-2050» Стратегиясында айтқан дамыған 30 мемлекеттің қатарына қосыламыз деген тапсырмасы міндетті түрде орындалатын болады», деді Розақұл Сатыбалдыұлы.
Асқар ТҰРАПБАЙҰЛЫ,
«Егемен Қазақстан».
