Бұл азамат бұған дейін темірден түйін түйіп, алтынды аптап, күмісті қаптап кісе-белдік, әшекейі әдемі сырға-жүзік, болатты балқытып қанжар-пышақ жасайтын өнерімен әйгілі-тін.
Енді міне, оның бәрін жинап қойып көркем картина жазуды бастапты. Өзінің айтуына қарағанда, ХІХ ғасырдың соңында Франция топырағында пайда болып, кейін күллі әлемге тарап, кескіндеме өнерінің бір жеке саласына айналған реалист импрессионизм бағытындағы суретші екен. Оқыған мамандығы да дәл осы.
Бұл жігіт 1979 жылы дүниеге келген. Қазір қырықтың қырқасына ілініп, қай жағынан да толысқан шағы. 1997 жылы орта мектепті бітірген ол ел астанасы Ұланбатыр қаласына барып, педагогикалық университеттің көркем сурет факультетінде білім алған.
– Сурет сала бастағаныма үш жылдың жүзі болды, – дейді талантты азамат: «Бұған дейін де туған жер табиғаты мен көшпенділік өмірдің саф мәдениетін сақтаған тұрмысын, әсіресе құсбегіліктің болмысы бұзылмаған тұнық көрінісін бейнелеу арманым еді. Қазір осы арманымды ұштау үстіндемін», дейді Ризабек ініміз.
Қылқалам шебері тынымсыз еңбектенудің арқасында соңғы үш жылдың ішінде 30-ға тарта картина салып шығыпты. Суреттерінің бояуы қанық, ешқандай қоспасыз көшпенді өмірдің этнографиялық бейнесін сомдаған. Яғни халқымыздың ежелгі құндылығын кескіндеме арқылы танытуға талпынған. Басты ерекшелігі де осы.
Суретшінің қолынан шыққан жұмыстары қазір халықаралық деңгейде өз бағасын алып жүр. Айтар болсақ, 2017 жылы Бай-өлкеде ұйымдастырылған АҚШ, Ресей, Моңғолия суретшілерінің біріккен көрмесінен «Этнотаным ерекшелігі үшін» атты номинацияның үздігі атанса, 2018 жылы Таулы Алтай қаласында өткен суретшілердің халықаралық көрмесінен де жүлде алыпты. Мұның сыртында өткен жылы Оңтүстік Кореяның Пусан қаласында ұйымдастырылған достастық елдерінің қылқалам шеберлері бас қосқан ірі шараға қатысқан екен. Жуықта ғана Кореяда ұйымдастырылған «Atomic pease» көрмесiне онлайн қатысып, сертификатқа ие болыпты.
