Кәсіпкерліктің әліппесін тереңірек танытуды мақсат еткен оқу орнында Назарбаев зияткерлік мектебінің оқушылары бір жыл тегін білім алады. Дарынды балалардың бизнес-жобасын дайындауға Қазақстан мен Ұлыбританияның осы саладағы жетекші мамандары қолдау көрсетуді көздеп отыр.
– Соңғы үш жыл бойы «MINIBOSS» Қазақстандағы жастардың кәсіпкерлік әлеуетін арттыруды қолға алды. Ал Атырауда биыл жұмысын бастаған мектеп өңірдегі жас өнертапқыштардың бастамасын қолдауға ниет білдірді. Халықаралық бизнес-мектептің қолдауына алғашқылардың қатарында ие болған Назарбаев зияткерлік мектебінің бес оқушысы – білім ұясындағы конкурстарда көзге түскен, әлеуметтік қолдауды қажет ететін отбасының балалары, – дейді бизнес-мектептің директоры Лилиана Хегай.
Оның айтуынша, аталған оқу орнын Еуропалық бизнесті дамыту қауымдастығы қаржыландырады. Қазір зияткерлік мектептің бес оқушысына 7500 еуро көлеміндегі білім гранты бөлінді. Оқушылар теориялық білімді түрлі ойындар, тәжірибелер негізінде меңгереді. Кейін өздерінің жобасын инвесторлар алдында қорғайды. Оқушылар ұсынған идея сәтті болса, кейін ұлттық чемпионатта бақ сынайды. Сондай-ақ жобаны әрі қарай қаржыландыру жолы қарастырылатыны белгілі болды.
– Мақсатымыз – әлемнің 15 елінен бизнестегі жастардың бас қосатын ақтық сайысына жолдама алу. Оған қатысу үшін тынымсыз еңбектену керек. Қазір оқушылар өз жобасын дайындауды бастады, – дейді халықаралық «MINIBOSS» бизнес-мектебінің директоры Лилиана Хегай.
Атырау облысы
