Партия төрағасы Серік Сұлтанғалидің айтуынша, «Бірлік» партиясы басқару органдарына ғана емес, мазмұнына да әсер ететін қайта жаңғыруға дайын.
– Біз партия атауын өзгерту мәселесіне (ребрендинг) қатысты зерттеу жүргіздік. Бұл зерттеуді кәсіби әлеуметтанушылар жүргізіп, олар атаудың 10-ға жуық жаңа нұсқасын қарастырды. Талдау нәтижесінде атаудың «Адал» нұсқасы көп қолдауға ие болды. Мұны әлеуметтанушы сарапшылар тұрғындардың жаңашылдыққа, әділеттілікке деген сұранысымен түсіндіріп отыр. Солай бола тұра, адамдар әділеттілік сөзінің аясына көп дүниені сыйдыратыны байқалады. Оны сыбайлас жемқорлыққа қарсы күрестен бастап, шешімдер қабылдаудағы ашықтықпен аяқтауға болады, – деді партия төрағасы.
Партия атауын өзгерту туралы ұсыныс саяси кеңес мүшелерінің дауыс беруіне шығарылып, нәтижесінде бірауыздан «Адал» деп өзгерту туралы шешім қабылданды.
Отырыс барысында партияның сайлауға қатысуға дайындығы туралы мәселе талқыланып, сайлауалды науқанның 7 бағыты ұсынылды. Бұл бағыттардың ішінде тұрғындардың кірісін арттыру, әділетті мемлекет қалыптастыру, білім беру мен адами капиталды, аймақтар мен агроөнеркәсіптік кешенді дамыту, жастарға жағдай жасау және сыбайлас жемқорлықпен күресу мәселелері бар. Науқанның соңғы нұсқасы 16 қарашада сайлау алдындағы съезде бекітіледі.
Серік Сұлтанғали күн тәртібіндегі сайлауалды мәселелерден бөлек, саяси кеңеске енген партияның 9 жаңа мүшесін таныстырды. Олардың қатарында «Атамекен» ҰКП Басқарма мүшесі Эльдар Жұмағазиев, «Шопан Ата» ұлттық қой өсірушілер қауымдастығының төрағасы Алмасбек Садырбаев, Тәжірибешіл экологтер қауымдастығының төрағасы Лаура Маликова, «Атамекен» ҰКП Басқарма төрағасының орынбасары Олжас Ордабаев, әлем чемпионы, қоғам қайраткері Ардақ Назаров, тележурналист Мақсат Толықбай, тележурналист, әлеуметтік жобалардың авторы Дәулет Мұқаев, қоғам қайраткері Игорь Шацкий, «Адал» партиясы филиалының басшысы Мұрат Қожамқұлов бар.
– Қазір біз Мәжіліс пен мәслихаттар үшін партиялық тізімдерді қалыптастырудамыз. Қорытынды бойынша әйелдер мен жастар үшін 30 пайыздық квота сақталады. 30 қыркүйекте өткен съезде өз күш-жігеріміз, тәжірибеміз бен көзқарасымыз бар екенін айтқан болатынбыз. Өз сөзімді, партияның жаңаруын растаймын. Жаңа құрылымның енгізілуі бізді одан әрі нығайта түседі. Бүгін біздің саяси кеңесімізге өз тәжірибесімен, білімімен бөлісе алатын түрлі саладағы жаңа тұлғалар, қоғам қайраткерлері енді. Біз сайлауға қатысуға дайындалып жатырмыз, тиісті идеологиялық, талдау және ақпараттық-түсіндіру жұмыстары басталды, – деді С.Сұлтанғали.
Отырыс соңында «Адал» партиясы мен Экологтер қауымдастығы арасында ынтымақтастық туралы меморандумға қол қойылды. Құжаттың негізгі мақсаты – Қазақстандағы қоршаған ортаның сапасын жақсартудағы өзара іс-қимылды кеңейту, тараптардың ынтымақтастығын арттыру саналады. Партия мен қауымдастық еліміздің экологиялық заңнамасын жетілдіру жөнінде бірлескен ұсыныстар әзірлейді. Сондай-ақ қоршаған ортаның, экологиялық зерттеулер мен экологиялық мәдениеттің сапасын жақсартуға бағытталған іс-шараларды жүргізеді.
