МӘМС аясында елорданың медициналық мекемелері профилактикалық тексеру, консультативтік-диагностикалық және стационарлық көмек, сондай-ақ қалыпқа келтіру емі бойынша қызмет көрсетті. Бұл туралы арнайы брифингте қалалық қоғамдық денсаулық сақтау басқармасының басшысы Тимур Мұратов мәлімдеді.
Оның айтуынша, жыл басынан бері КТ және МРТ, медициналық-генетикалық зерттеулер сияқты медициналық қызметтің қымбат түрлері БМСК дәрігерінің жолдамалары бойынша барлық пациентке тегін көрсетілді.
Сондай-ақ қаңтар айынан бастап, амбулаториялық деңгейде ұсынылатын дәрілік заттардың тізімі көбейді. Атап айтқанда бұл тізімге 29 ересек және 53 балалар аурулары бойынша жаңа нозология енгізілген.
"Әлеуметтік медициналық сақтандыру қоры" КеАҚ елордалық филиалының директоры Нұрлыбек Қабдықапаров атап өткендей, науқастармен тұрақты кері байланыс жүргізіледі.
– Байланыс-орталығына 1406 нөмірі арқылы азаматтардың өтініштері мен шағымдары қабылданады. Медициналық қызмет көрсету мәселелері бойынша қордың Нұр-Сұлтан қаласы бойынша байланыс орталығында 2020 жылғы 1 қаңтар мен 1 қараша аралығында 92 241 өтініш тіркелген, олардың барлығын бөлім мамандары қараған, – деді Н.Қабдықапаров.
МӘМС жүйесіндегі өз мәртебеңізді ресми сервистер арқылы – ӘМСҚ сайтында (fms.kz), "Qoldau 24/7" мобильді қосымшасында, Telegram-дағы Saqtandyru-bot-та тексеруге болады. "Qoldau 24/7" қосымшасын жүктеп алып, өтініш, алғыс, ұсыныс қалдыруға болады. Міндетті әлеуметтік медициналық сақтандыру және медициналық қызмет көрсету мәселелері бойынша кеңес алу да мүмкін.
