Мәселен, жақында Алматы телеарнасындағы тікелей эфирде Медеу ауданының тұрғыны қойып жатқан бір сауалды құлағамыз шалып қалған-ды. Саусақпен санарлық күнде қала әкімі Бақытжан Сағынтаев аудан тұрғындары арызданған сол аумақта жүргенін көріп қуандық. Және кешке қарай Медеу ауданының мәселесі қалай шешіліп жатқаны туралы нақты мәлімдеме де таратты.
Cөйтсек тау бөктеріндегі тұрғындар қарғын су мен көшкіннен қорқып бұған дейін де әкімнен бірнеше рет көмек сұраған екен. Енді қаражат бөлініп, беткейлерді нығайтуға мүмкіндік беретін габион құрылымдарының құрылысы мен жаңбыр суларын ағызатын арықтар жасалып жатыр.
Мәселен, «Думан» ықшам ауданында 18,5 шақырымдық сумен жабдықтау және 26 шақырым су бұру желілерінің құрылысы аяқталып келеді. Қоғамдық көлік бағыттары өтетін Хан Тәңірі, Қазығұрт, Қарқаралы, Ақмешіт, Бурабай, Болашақ көшелерінде 3,7 шақырымдық жол күрделі жөндеуден өтіп жатыр. Сол күні қала әкімі өзінің әлеуметтік парақшасында «Келесі жылы қалған 53 көшенің жолдарын жөндейміз. Сондай-ақ «Мұзтау» шағын ауданында инженерлік желілерді салуға байланысты қазылған жол жабынын тез арада қалпына келтіруді тапсырдым. Бутаковка шатқалына апаратын жолдың ұзындығы – 4,6 шақырым. Бұл жол туристік бағыттардың қатарына кіреді», деп жазды.
Тағы бір мәселенің шешімі жауын-шашын салдарынан көшкіннің жүруі ықтимал «Компот» тұрғын алабы халқының тілеуін қабыл етті. Көккинаки көшесіндегі қауіпті аймақта 42 үй болған. Биыл жыл соңына дейін жалпы ұзындығы 350 шақырым болатын беткейлерді нығайту жоспарланған. Алмалық көшесі бойындағы еңісті нығайтып, арық жүйесін орнату жұмыстары аяқталды, мұндағы қауіпті аймақта 60 үй бар болатын.
Сондықтан қазіргі күндері «Қала әкімінің тұрғындармен өткен кездесуінде мен осы мәселені айттым», «Әкім біздің өтінішімізді ескерусіз қалдырмады», «Спорт алаңдарын орнатты, балалар стадионын ашты» дейтін алматылықтар аз емес. Белсенді қала тұрғындары әлеуметтік инфрақұрылым мәселелері қалай шешімін тауып жатқаны туралы әлеуметтік желілерде пікірлерін жазып жатады.
Мәселен, осы жолы Алматының әкімі Бақытжан Сағынтаев Әуезов ауданындағы жұмыс сапары барысында аудан тұрғындарының өтініштері негізінде жүзеге асырылған әлеуметтік жобалармен танысты. Алматының Әуезов ауданында биыл әлеуметтік тұрғын үй-коммуналдық шаруашылығын дамыту мен аумақтарды абаттандыруға бағытталған 39 жоба жүзеге асырылды.
Осы сапарында «Достық» шағын ауданының Ақсақалдар кеңесінің төрағасы Әли Ахметов инженерлік желілерді жаңғырту және жол жағдайын жақсарту бойынша жасалған жұмыстарды атап өтті. «Біздің ауданда осының алдында кәріз жүйесі болмады, су құбырлары жұмысқа жарамсыз, кей жерлерде жарық та жоқ еді. Соңғы кездері осы бағыттарда ауқымды жұмыс атқарылып жатыр. Ауданымызда спорт алаңдарын орнатты, енді бізде футбол, волейбол және баскетбол алаңдары бар. Бізді біраз уақыттан бері жолдардың сапасы алаңдатып келген, бірақ енді бұл іс те қолға алынды. Қазір жолымызды жөндеп жатыр. Енді бәрі жоғары деңгейде болады деп сенеміз», дейді ол.
Сол сияқты, ауданның тағы бір тұрғыны Ділмұрат Мұсаев бұған дейін стадионның орны бос жатқанын және тұрғындардың сол аумақты өз күшімен абаттандырмақ болғанын айтты. Бірақ ол үшін көп күш пен қаражат қажет болған. Енді қала әкімінің тікелей аралсуымен іске асқан тірлік үшін әкімдікке алғысын білдіріп, барлық жұмыстың тұрғындардың өтініші бойынша олардың тілектерін ескере отырып жасалғанын атап өтті.
Зейнеткер Гүлдария Қастеева ауданда қарттар үшін демалыс орындары пайда болғанына қуанады.
«Біз бұл ауданда 30 жылдан аса уақыт тұрамыз. Бұрын балалар үшін үлкен аумақ болған, бірақ уақыт өте келе ол жоқ болды. Бірақ бүгінгі таңда бізде балаларға арналған алаңдар, спорт алаңдары орнатылды, тротуарлар жөнделді, жол жиектері ауыстырылды. Бізді де ұмытқан жоқ, ауданның қарт тұрғындары қолданатын тренажерлер орнатылды. Міне, қазір мен тренажерлерге бару үшін шықтым. Біз аудан тұрғындары, атқарылған жұмыстар үшін өте ризамыз», дейді қария.
АЛМАТЫ
