Облыста 3 жылжымалы медициналық кешен жұмыс істейді. Индустрия және инфрақұрылымдық даму министрлігінің Индустриялық даму және өнеркәсіптік қауіпсіздік комитеті біздің облыс, соның ішінде Қорғалжын, Зеренді, Жарқайың, Есіл, Ерейментау, Астрахан, Аршалы, Ақкөл аудандары үшін өз елімізде өндірілген 8 жылжымалы медициналық кешенді сатып алуды жүзеге асырған болатын. Салтанатты жиында облыс әкімі аудандық ауруханалардың бас дәрігерлеріне аталмыш жылжымалы кешендердің кілттерін тапсырды.
Облысқа қаржылық лизинг бойынша санитарлық авиация және жедел жәрдем қызметі үшін 58 санитарлық көлік жеткізу көзделген. Оның 30-ы Hyundai H350, 25-і JAC Sunray, 3-еуі УАЗ Профи көліктері. Бүгінгі таңда осы көліктердің жартысынан астамы келіп жетті. Барлық көліктер тұрғындарға көмек көрсетуге арналған қажетті медициналық құралдармен жабдықталған. Облыстық жедел жәрдем станциясына реанимобильдер, облыстық полиция департаменті мен Көкшетау қалалық полиция басқармасына патрульдік автокөліктер, облыстық төтенше жағдайлар департаментіне өрт сөндіруге арналған техникалар табыс етілді.
– Барлық материалдық және адами ресурстар індетпен күресуге бағытталған. Ауруды одан әрі таратпау үшін елімізде барлық қажетті шаралар қабылдануда. Коронавируспен күрес мәселесі – ел Президенті Қасым-Жомарт Тоқаевтың жіті бақылауында. Соңғы күндері елімізде инфекция жұқтырғандар саны өсіп жатыр. Біздің облыс – эпидемиялық ахуалы күрделі төрт аймақтың қатарында, – деді облыс әкімі Ермек Маржықпаев.
Жаман тұмаудың алғашқы легі жан алқымнан алған кезде адал еңбегімен көрінген бірқатар сала мамандарына «Халық алғысы» медалі табыс етілді.
Тағы бір маңызды оқиға Көкшетауда 200 орындық жұқпалы аурулар орталығының ашылуы екені сөзсіз. Үкіметтің қолдауымен небәрі аз уақыттың ішінде бой көтерген бұл орталықта пандемия кезінде, одан кейін де жұқпалы ауруларға шалдыққан науқастардың сапалы, жоғары білікті медициналық көмек алуына қажетті жағдайлардың барлығы жасалған. Орталықтың ұйымдастырушылық құрылымының өзіндік ерекшеліктері бар. Мұнда жұқпалы ауруларға шалдыққан науқастар толық оқшауланып, індеттің таралмауы үшін барлық жағдай қарастырылған. Желдету, сүзгілеу жүйесі вирустың науқастан өзгеге жұқпауын қамтамасыз етеді. Орталық компьютерлік томограф, цифрлық рентген, ӨЖЖ аппараттары секілді заманауи құралдармен жабдықталған. Әр кереует оттегі стансасына қосылған. Өткен жаз айларында індеттің өршіп кетіп, өлім-жітімнің орын алуының негізгі себебі осындай жабдықтардың болмауынан еді. Бүгінде облыстың медициналық ұйымдарында 425 ӨЖЖ аппараты, шамамен 600 оттегі концентраторы, 32 рентген аппараты, 9 компьютерлік томография бар.
Ашылу салтанатында сөз сөйлеген Көкшетау қаласының құрметті азаматы, медицина саласының ардагері Болат Жанәділов пен жазушы-драматург, қоғам қайраткері Жабал Ерғалиевтің лебіздерінде елге жасалып жатқан қамқорлыққа халықтың разы екені айтылды.
Орталық 8 корпустан тұрады. Мұнда 180 төсектік орын тәуліктік емделуге арналған және 20 төсектік орын қарқынды терапия бөлімшесі болып табылады. Бір палата екі науқасқа лайықталған. Ішінде жуынатын орын, ауыз суы бар. Реанимациялық бөлімше бейнекамерамен бақыланып отырады.
Жақсылық жауған осы күні облыстық көпбейінді ауруханада магнитті-резонансты томография кабинеті ашылды. Signa Creator аппаратын сатып алуға жергілікті бюджеттен бөлінген 568 млн теңге бөлінген. Аурухананың бас дәрігері Нұрлан Жаровтың айтуынша, бұл томография аппараты «гелидің нөлдік буға айналуы» технологиясының арқасында қиын жағдайда да аурудың нақты көрінісін білуге мүмкіндік береді. Ең бастысы, міндетті әлеуметтік медициналық сақтандыру жүйесі аясында МРТ зерттеуі тегін жүргізіледі. Ол үшін тұрғындар өз учаскелерінен жолдама алуы қажет. Медициналық сақтандыру жарнасын аудармайтын тұлғалар диагностиканы ақылы өте алады.
Көкшетау
