Жамбыл облыстық сәулет және қала құрылысы басқармасының басшысы Арман Әбдешовтің айтуынша, әрбір жоба бойынша жұмыс істейтін сәулетшілер, құрылысшылар және басқа да мамандар тарихи шаһарды тартымды әрі өмір сүруге ыңғайлы етуге барын салуда.
Шыны керек, осы уақытқа дейін Тараз қаласын түрлендіру жұмыстарына байланысты көптеген сын айтылған болатын. Енді біраз уақыттан бері осы олқылықтың орны толып келеді. Мәселен, жуырда ғана облыс орталығынан ашылған «Қазақ халқына мың алғыс» монументі бүгінде тараздықтар үшін көрнекті орынға айналған. Сол сияқты Қазақстан халқы Ассамблеясының 25 жылдығына орай тұрғызылған ескерткіш те ұлттың көрген қиындығын, түрлі тарихи сәттерді еске салады. Аталған ескерткіштің биіктігі 30 метр. Оның жоғарғы бөлігінде қалықтаған қыран, ал сәл төменірек барлық этностың бірлігі мен ынтымағын білдіретін шаңырақ орналасқан. Сонымен қатар 580 метрлік Арбат-1 аллеясы да – қазіргі кезде қаланың көркін арттырып тұрған сәулеттік жоба. Мұнда екі сазды және екі құрғақ субұрқақ орнатылған.
«Бүгінде құрғақ субұрқақтар қала сәулетінің ажырамас бөлігіне айналуда. Мұндай құрылымдардың су ыдысы жер бетінде емес, жер астында жасырылған. Ағындар одан тіке атқылайды, ал фонтан жұмыс істемеген кезде тротуар құрғақ күйде сақталады. Құрғақ субұрқақ деген атауы да осыдан шыққан. Осындай ерекше субұрқақтарды қаланың тағы бірнеше жеріне орнатуды жоспарлап отырмыз», дейді А.Әбдешов.
Бүгінгі таңда Тараз қаласында «Арбат-3» жаяу жүргіншілер аймағының үшінші кезеңінің құрылысы жүргізілуде. Аталған аймақ «Көне Тараз» кешені мен Қарахан кесенесін байланыстырады. Арбатта 22 травертиндік тақта орнатылып, ол тақталарда ежелгі Тараз тарихының маңызды кезеңдері қашалып жазылады. Жұмысқа жауапты мердігерлер көп ұзамай 320 метрлік сазды субұрқақтардың құрылысын аяқтайды. Сол сияқты «Біз біргеміз!» монументі де – ұлттық нақышпен көмкерілген туындылардың бірі. Композицияның ортасындағы Жер шарын қол ұстасқан дәрігерлер, әскери, полиция қызметкерлері, өрт сөндірушілер, құтқарушылар және еріктілер секілді түрлі мамандық иелері қоршап алған.
«Сәулетшілер бірлік пен қоғамдық келісім идеясын жеткізуге тырысты. Біздің халқымыз коронавирус індетімен күрес кезінде, Арыс қаласында жарылыс болған кезде, Түркістан облысының Мақтаарал ауданында төтенше жағдай орын алғанда да ұйымшылдық пен ынтымақтастықтың үлгісін көрсете білді. Бұл ескерткіш болашақ ұрпақ үшін осындай оқиғалардың естелігі болып қала береді», дейді А.Әбдешов.
Қазіргі кезде Тараз қаласының барлық бөлігінде құрылыс жұмыстары жүріп жатыр. Жуырда «Қарасу» массивінен «Денсаулық» паркін ашу жоспарланған. Сонымен қатар Қ.Рысқұлбеков атындағы саябақ маңынан «Анаға тағзым» орталығы салынуда. Аталған орталықтың алдынан аналардың құрметіне арналып ескерткіш орнатылады. Сондай-ақ «Ұлан» стадионының қайта құру жұмыстары басталғанын да айта кету керек. «Мамыр тоғайы» аймағында ауқымды қайта құру жұмыстары жоспарланған болса, «Тектұрмас» этно-тарихи кешенін қалпына келтірудің екінші кезеңі бойынша қолға алынған жұмыстар аяқталуға жақын екен. Мұнда ұзындығы 15-20 метр болатын панорамалық панель, аймақтың тарихи нысандарының макеттері, жағажай, жасанды сарқырама салынуда. Бұдан бөлек тарихи Тараз шаһарынан салынатын нысандар көп. Алдағы уақытта тараздық тұрғындар көптеген игілікке куә болады деген сенім бар. Кезінде Тараз қаласының ескіріп, тозып бара жатқаны жиі айтылатын. Дегенмен мемлекет қолдауының нәтижесінде көпшіліктің тілегі ескеріліп, көне шаһар жаңартылуда.
Жамбыл облысы
