К.Клей 12 жасқа толғанда туған күніне үй-іші велосипед сатып әпереді. Қуанышы қойнына сыймаған кішкентай К.Клей дүкенге де велосипедімен барады екен. Бірде дүкенде бір минуттай ғана болып сыртқа шықса, көлігі жоқ. Ал келіп жыласын. Болған оқиғаны жергілікті полицияға хабарлап, егер де ұрлықшы табылар болса, өлтіре сабайтыны жайлы ант береді. Полицей болса: «Алдымен бокс үйрен, содан кейін ұрлықшыны табамыз», дейді. Бұл полиция қызметкері «Колдби Жим» клубының бапкері болатын. Ол осылай К.Клейді боксқа әкелген.
Жаттықтырушы К.Клейді әкеліп тәжірибесі бар баламен жұдырықтастырады.Ол болса, тіптен қиналмай-ақ жеңеді. Өмірінде тұңғыш рет бокс қолғабын киген күні қарсыласынан басым түсуі оның боксқа деген үлкен құштарлығын оятады.
Бокс үйірмесіне келгеніне бірнеше апта ғана болған К.Клей жолдастарымен бірге автомашина дүкеніне соққан кезінде сонда тұрған «кадиллак» машинасын нұсқап, «Мен ұлы боксшы боламын, көп ақшам болады, сонда осы машинаны аламын», дейді. Басқалары оны мазақтап күледі.
1960 жылы 18 жасқа толған К.Клей әуесқой боксшылар арасында «Алтын қолғап» бәсін алты рет жеңіп алып, АҚШ-тың олимпиадалық құрамына қабылданады. Осы жылдың тамыз айында Италияда Олимпиада чемпионы атанады. Әуесқой бокстың ең биік шыңын бағындырған ол осыдан былай кәсіпқой боксқа ауысып, өз есімін мұсылман дінін қабылдауына байланысты «Мұхамед Әли» деп өзгертеді.
