Тараз қаласының тұрғыны Бестерекбай Бекберовтің де кез келген сөзді соңынан басына қарай оқитын қабілеті бала күнінде байқалған. Оның тағы бір ерекшелігі – ол тек жекелеген сөздерді теріс оқып қана қоймай, естіген сөйлемін де кері оқып бере алады. Тіпті, ол осы тәсілді қолданып, өлең оқып, ән де сала береді екен. Газет, кітап дегендеріңізді де соңынан басына қарай оқи алады. Біз де ерекше кейіпкердің өзімен жолығып, өнерін тамашаладық. Бұл күнде Бестерекбай Бекберовтің жасы жетпістің төңірегіне жетіпті. Кезінде көптің көзіне түсуді аса қаламаған ол осы күнге дейін бар өнерін болмысына жасырып жүріпті. Өнерін шағын ортада ғана болмаса, жалпақ жұртқа көрсетіп жар салмапты. Тек кезінде жергілікті басылымдар жазып, телеарналар көрсетіпті. Өзінің айтуынша, ол сөздерді кері айтуға бала күнінде машықтанған. Оған кино көруге деген құштарлығы себеп болыпты. «Бір күні ауылға кино келді. Мұндайда ауыл балаларының клубты жағалайтын әдеті ғой. Бір топ баламен біз де клубқа бардық. Бұл жолғы кино – ежелгі грек батыры Спартак туралы. Киноның аты да «Спартак». Ересек адамдар кіріп болған соң, билет тексеруші апай бізге де назар аударды. Бірақ бізде билет жоқ. Содан ол кісі есікте ілулі тұрған киноның жарнамасын нұсқап, бізге «Мына сөзді кім бірінші оқыса, сол кіреді», деді. «Спартак» деп жарыса жауап берген екі бала ішке кіріп кетті. Содан мен «Апай, мен сол сөзді теріс оқып берсем бәрімізді де тегін кіргізесіз бе?», дедім. «Ал айта қойшы» дегенде, «Катрапс» дедім. Апай жарнамаға бір, бізге бір қарады да, бәрімізді ішке кіргізіп жіберді», дейді ол. Кейіпкеріміздің жасы бұл кезде 12-де екен.
Әскерден келген соң Бестерекбай Бекберов облыстық «Колхозаралық құрылыс» мекемесіне жұмысқа орналасады. Мұнда ол қатардағы есеп жүргізушіден құрылыс шебері, прораб дәрежесіне дейін көтеріледі. Әр жылдары Тараз қаласындағы «Химмонтаж», Қызылорда қаласындағы «ЛукОйл», Атырау қаласындағы «ТеңізШевройл» ұйымдарында қызмет етеді. Өндірістік жетістіктері үшін құрылысшы Бестерекбай Бекберовтің есімі 1981 жылы Қазақ КСР-нің «Алтын Кітабына» жазылады. Күнделікті тіршілікпен жүріп ол бұл қабілетін танытуға көп ден қоймайды. Тіпті кезінде таныстары оған Майя Датунашвилиді сөзсайысқа шақыруға да кеңес беріпті. Бірақ оның бәрі де сөз күйінде қалған. «Ел іші – өнер кеніші» дейді қазақ. Бұл да көп кездесе бермейтін өнердің бір түрі болса керек. Егер Бестерекбай сияқты қабілетті азаматты ел танып жатса, кезінде өздері таңданған Датунашвилидің өнерінен бір де кем соқпайтынын көрер еді. Бұл күнде Бестерекбай Бекберовтің арманы Майя замандасы сияқты Гиннестің рекордтар кітабына ену екен. Оның өнерін тамашалаған адам бұған шәк келтіре қоймас.
Жамбыл облысы
