«Ата даңқымен қыз өтер, мата даңқымен бөз өтер» демекші таңдалған үш кандидаттың да әкелері облыс тұрғындарына жақсы танымал жандар еді. Соның ішінде «Зенченко и К» коммандиттік серіктестігінің қазіргі бас директоры Г.Зенченконың әкесі Еңбек Ері Г.Зенченко болса, «Солтүстік» ӘКК АҚ басқарма төрағасы Есжан Оразалиннің әкесі Қаби мен Дмитрий Колоданың әкесі Владимир де аудан әкімі болған, облысқа белгілі адамдар. Бірақ бұлардың өзі де облыс халқына іскерлігімен танылып жүрген жастар, еліміз өз Тәуелсіздігін алған жылдарда қалыптасқан тұлғалар. Олар өздерімен таласқа түскен басқа он үміткерден гөрі көп дауыс жинай алды. Өмірдің барлық саласы бойынша көтерілген тақырыптарда олар басқалардан озық көрінді.
Сонымен бірге осы конференцияда Солтүстік Қазақстан облысының мәслихатына партиялық тізіммен түсетін үміткерлердің тізімі бекітілді. Олардың жалпы саны 48 адам болды. Кандидаттардың тура үштен бірі – әйелдер. Сондай-ақ жастардың үлесі де 21 пайызға жетіп отыр. Бұрынғы депутаттардың арасынан 10 адам ғана жаңа құрамға енгізілді.
Кәсіби құрамына келетін болсақ, үміткерлердің ең үлкен бөлігі, яғни 27 пайызы ауыл шаруашылығынан, 17 пайызы кәсіпкерліктен, және 10 пайыздан артығы денсаулық сақтау саласынан болып отыр.
Конференцияда делегаттар Nur Otan партиясының аймақтық сайлауалды бағдарламасын да бекітті. Онда дамудың жеті басымдығы нақтыланған еді. Сонымен бірге делегаттар партияның ХХ съезіне баратын делегаттарды сайлады және облыстық филиалдың саяси кеңесінің жаңа құрамын бекітті.
Конференция бекіткен жеті басымдықтың арасында аймақ экономикасының дамуы, халықтың әл-ауқатын арттыру, тұрғындар қауіпсіздігінің артуы және т.б. бар. Жалпы, облыс бойынша бір облыстық, бір қалалық және 13 аудандық сайлауалды бағдарлама әзірленген.
Партияның облыстық филиалы төрағасының бірінші орынбасары Әсем Рахметованың айтуына қарағанда, мүшелерден 1150 ұсыныс мен пікір түскен. Соның ішінде 1088-і сайлауалды бағдарламаларына байланысты. Соның ішінде 978 ұсыныс сайлауалды бағдарламаларының жобаларына енгізілген. 19 ұсыныс бойынша шаралар қабылдануда, ал 10 ұсыныстың шешімі республикалық деңгейге жататындықтан қарастырылмаған. Ұсыныстар мен пікірлердің негізгі бөлігі, яғни 34 пайызы көлік пен инфрақұрылым, 25 пайызы тұрғын үйлер мен ТҮШ, 8 пайызы білім беру саласын қамтыған.
Айта кететін жайт, партиялық конференциялар барлық аудандар мен Петропавл қаласындағы филиалдарда өткізілді. Облыстық праймеризге 632 партия мүшесі қатысып, бір айдың ішінде сайлаушылармен 6500 кездесу өткізді. Оған шамамен 125 мыңдай адам қатысты.
Солтүстік Қазақстан облысы
