Кеше БҰҰ Эфиопия үкіметіне елдегі 4 лагерьге апарар жолды ашуды тапсырды. Мемлекеттегі шиеленіс салдарынан гуманитарлық көмекке зәру топпен байланыс үзілген. Олар бірнеше айдан бері еш көмек ала алмай келеді.
БҰҰ-ның босқындар мәселесі бойынша Эфиопиядағы өкілі Энн Енконтр «Гуманитарлық көмекті жеткізу қиындап кетті. Босқындармен байланыс үзіліп, шамамаен 100 мың эритреялық азық-түліксіз қалды», дейді.
Азық-түлік жеткізуді былай қойғанда, кейінгі күндері олардан хабар алу да мүмкін болмай кеткен. «Біздің байланыспағанымызға 2 күннен астам уақыт өтті. Жағдайды түзеуді, босқындармен байланыстыруды сұраймыз», дейді Э.Енконтр.
БҰҰ дерегіне назар салсақ, 2018 жылдан бері 507 мыңға жуық эритреялық елінен кеткен. Бұл дегеніміз – жалпы халықтың оннан бір бөлігі.
Халықаралық ұйымдар олардың Эфиопияға жайғасқанын құп көрді. Өйткені мұндағылармен тілі ұқсас, салты бір. «Қалыпты өмірін күрт өзгерту де лагерьлерге ауыр соққы. Сондықтан өз мемлекетіне мейлінше жақын мемлекеттерде лагерь құру босқындар үшін тиімді», дейді БҰҰ өкілдері. Ал енді Эфиопияның Тиграян елді мекенінде азаматтық соғыс жүріп жатыр. Эфиопия үкіметі тиграяндықтарға қарсы этностық қысым барын жоққа шығарып, елдегі шиеленісті түсінбеушілікке балады. Кей мәліметтерге сүйенсек, Эфиопия үкіметі лагерьдегі босқындарды да соғысқа үгіттеген. Босқындар «Эритрея мен Эфиопияда ешқашан тыныштық орнамайды», деп күрсінеді.
