– Бидай бағасының тұрақсыздығы кейбір азық-түлік бағаларының өзгеруіне әсер етуде. Баға көтерілмеуі үшін бұрынғыдай бидайдың мемлекеттік қорын жинақтау жолын қарастыру қажет, – деді ол.
Қазіргідей қауіпті індет қос бүйірден қысып тұрған уақытта көпшілік үшін күнделікті тұтынатын тауар бағасының тұрақтылығы өте маңызды. Өкінішке қарай, бір жыл ішінде қарақұмық – 33 пайызға, өсімдік майы – 13,9, сәбіз – 14,9, картоп – 16,1 пайызға, сары май бағасы – 11,5 пайызға қымбаттаған. Осылайша аталған өнімдердің жылдық өсім динамикасы инфляцияға ұшырады.
Өткен аптада ғана тауық жұмыртқасы – 2,1, күнбағыс майы 1,9 және қырыққабат бағасы 1,2 пайызға көтерілген. Тауар бағалары не себепті қымбаттағанға келер болсақ, бұған сыртқы нарықтағы күнбағыс дәні, қырыққабат және тауық жұмыртқасы сияқты тауарлардың импорты әсер еткен. Жергілікті тұрғындардың әлеуметтік жағдайын ескере отырып, облыс орталығындағы 12 сауда орнында әлеуметтік сөрелер арнайы ашылған. Бұл жерде азық-түлік бағасы арзан бағада саудаланады.
Бұдан бөлек, Тараз қаласындағы 7 дүңгіршек тұрақты жұмыс істейді. Мұнда жыл басынан бері халыққа 11 әлеуметтік тауар түрі нарық бағасының 8-20 пайызға төмен бағада берілген. Саудаланған тауарлардың жалпы көлемі 954,3 тоннаны құрайды.
Бүгінде облыстағы тұрақтандыру қорының қоймасында 2273,6 тонна әлеуметтік азық-түлік тауары бар. Қоймадағы азық-түлік тұрғындарды қамтамасыз етуге арналған. Оның ішінде форвардтық келісім бойынша 320 тонна нан, 398 мың дана тауық жұмыртқасы, 3,2 тонна тұз, 700 тонна қант, 22 тонна тауық еті, 10 тонна сүт, сондай-ақ 428,3 тонна картоп, 332 тонна пияз және 191 тонна сәбіз босатылатын болады.
– Қазіргі кезде тұрақтандыру қорының есебінде 837,3 миллион теңге қаражат бар. Оның 154 миллион теңгесін қараша айынан бастап айналымға қосып, сауда желілері мен тауар өндірушілерге несие ретінде беріп отырмыз. Қазір коронавирус індеті халықты қыспаққа алуда. Сондықтан да қиын кезде қарапайым тұрғындарға салмақ түспеу үшін бағалардың негізсіз өсуіне жол бермеу керек. Бұл мақсатта Тараз қаласының негізгі 12 ірі сауда орнында бағаларды мониторингілейтін 4 мобильдік топ жасақталды, – дейді Жандос Жақыпов.
Жамбыл облысы
