Волонтерлер тек мұқтаж отбасыларға ғана емес, індет кезінде ерекше көзге түскен медицина қызметкерлеріне де қолдау көрсетуде. «Мың алғыс!» жалпыреспубликалық акциясы аясында 100-ден аса медицина қызметкерінің отбасын азық-түлік өнімдерімен, 1 700 маманды ыстық тамақпен қамтамасыз етуге 88 ерікті мен 25 автоволонтер жұмылдырылды.
Мұнан бөлек, Birgemiz. Bilim бағыты бойынша көпбалалы, әлеуметтік жағынан аз қамтылған 650 отбасының мектеп жасындағы балаларына қажетті оқу құралдары алынып берілді. Birgemiz: Saulyq бағыты бойынша санитарлық талаптардың сақталуын қадағалау тұрақты жүргізілуде.
Бұл шаралардың барлығы өңірдегі меценаттардың, демеуші азаматтардың қолдауымен жүзеге асырылғанын айта кету керек. Қиналған жанға қолұшын созуға даяр іскер азаматтар арқасында көп мәселе шешімін тапты.
Мысалы, жеңіл өнеркәсіп саласындағы белгілі кәсіпорын – «DALATEX» ЖШС басшысы Ділмұхамед Әбизовтің бастамасымен қала тұрғындарына 7 000 бетперде тегін таратылды. Күріш өндірісіндегі «Абзал и К» компаниясы 400 отбасыға азық-түлік себетін үлестіріп, 1 көпбалалы анаға баспана сыйлады. «Абай Дәулет» ЖШС көмегімен 620 000 теңгеге медициналық маска тігетін 4 тігін машинасы сатып алынды.
Осы жазда көршілес Түркістан облысындағы Мақтаарал ауданы тұрғындарына су тасқыны қауіп төндірген шақта да Сыр еріктілері сырттап қалған жоқ. Олар облыс жұртынан көршілес өңір тұрғындары үшін гуманитарлық көмек жинап, бастамашыл топтар мен 180 волонтер ондаған қайырымдылық керуенін ұйымдастырды.
Еріктілер күздің алғашқы екі айында 20-ға жуық қайырымдылық шара ұйымдастырып, отыздан астам жалғызбасты қартқа көмек беріп, үйлерінің мұржасын тазалады, тұрмысы төмен отбасыларға азық-түлік себеттері, тұрмысқа қажетті заттар, киім-кешек алынды.
Өңірде волонтерлік бағыттағы шараларды қолдау бағытында «Еріктілер қозғалысын дамыту» әлеуметтік жобасы жүзеге асырылуда. Жобаға облыстық бюджеттен 5 млн 678 мың теңге қаржы бөлінді.
Елдің бірлігі сынға түскен пандемия кезінде жастардың азаматтық жауапкершілік пен белсенділігінің артқаны анық байқалды. Мысалы, осыдан 1 жыл бұрын облыстағы волонтерлер саны 150 болса, бүгінде олардың қатары 1000-ға жуықтады. Оның 801-і ресми ерікті ретінде тіркеліп, өңірдің қоғамдық өміріне белсенді араласып, өз үлестерін қосып келеді.
Қиын сәтте жұрт жанынан табылған еріктілер еңбегі де елеусіз қалған жоқ. Өңірдегі 5 меценат, үкіметтік емес ұйымдардың 10 өкілі, 30 волонтер Мемлекет басшысының Жарлығымен тағайындалған «Халық алғысы» медалімен марапатталды. Сонымен қатар пандемия кезінде тұрмысы төмен 3 800 отбасына азық-түлік өнімдерін үлестіріп, 30 миллион теңгеге облыс ауруханаларына 200 дана оттегі концентраторын алып берген «Ел-Арай» қоғамдық қоры облыстық «Жомарт жүрек» сыйлығының «Жылдың үздік ұйымы» аталымын, Қармақшы ауданындағы 40 отбасына көмек көрсеткен, аудандық ауруханадағы науқастарға дәрі-дәрмектер алуға демеушілік жасаған Орынбасар Төлепов «Жыл меценаты» аталымын иеленді. Қазалы ауданындағы кәсіпкерлерімен бірлесіп 55 отбасыны азық-түлікпен қамтамасыз еткен, аудандық ауруханаға төсек жабдығы мен қорғаныш киімдерін табыстаған жас волонтер Мархаббат Асановаға «Жыл тұлғасы», Қызылорда қаласындағы Тәуелсіздік даңғылының бойын көркейтуге, пандемия кезінде өкпеге жасанды тыныс беретін аппарат пен оттегі концентраторларын алуға миллиондаған қаражат бөлген меценат Роза Имановаға «Туған өлке» кәсіпкерлерден жинақталған 3 000-нан аса бетпердені таратып, жеке көлігімен қала аумағындағы аурухана қызметкерлеріне тамақ, науқастарға оттегі баллондарын жеткізген Динара Эшатоваға «Ерен еріктілік» аталымы тапсырылды.
«Қамқорлық» дағдарыс орталығы, «Ұмай» қайырымдылық үйі, «Шапағат» қоғамдық қоры да ортақ іске үлкен үлес қосқан, көптің алғысына лайық ұйымдар.
Қызылорда
