Әйелдер күресінен Қазақстан чемпионаты аяқталды

Спорт • 24 Қараша, 2020

Әйелдер күресінен Қазақстан чемпионаты аяқталды

31 рет көрсетілді

Алматыдағы "Достық" спорт кешенінде әйелдер күресінен Қазақстан чемпионаты өз мәресіне жетті. Бұл бәсекеде сақа спортшылармен қатар, дарынды жастар да бой көрсетті. Бір ғана тәулік ішінде олар 10 салмақ дәрежесі бойынша жеңімпаздар мен жүлдегерлерді анықтады, деп хабарлайды Egemen.kz.

Ғалым СҮЛЕЙМЕН

Айтулы жарыстағы 76 кило салмақтың финалдық сайысы көпшілік назарын өзіне аударды. Өйткені шешуші сында жолдары қиысқан қос қарсылас та өте мықты еді. Атап айтсақ, қарағандылық Елмира Сыздықова Азия ойындарында бір мәрте және Азия біріншілігінде бес рет жеңіс тұғырына көтерілген. Өскемендік Екатерина Ларионова әлем және құрлық чемпионаттарының қола жүлдені еншілеген. Бұл балуанның екеуі де 2016 жылы Рио Олимпиадасында үшінші орынға табан тіреп, алыстағы Бразилияда көк байрағымызды биікте желбіретті. Ғаламдық додада олар түрлі салмақ дәрежелерінде күш сынасқан еді. Ал Алматы төріндегі тартыста Елмираның басымдығы байқалды. Екатеринадан айласын асырған ол алтыннан алқа тағынды.

Алматы облысының намысын қорғаған құрлық біріншілігінің екі дүркін жүлдегері Аяулым Қасымова (62 кило) мен Азия чемпионы Жамилә Бақбергенова (68 кило) өздерінің мықтылығын бірден мойындатты. Ақтық сынға дейін алқынбай жеткен Аяулым шешуші тұста өзінің командалық әріптесі Ирина Кузнецованы қапы қалдырса, Жамилә Шығыс Қазақстан облысының өкілі Ирина Козюлинаға шаң қаптырып кетті.

Нұр-Сұлтаннан келген бұрымдылар да бабында екендерін байқатып, үш рет жеңіс тұғырының ең биік сатысына көтерілді. Бұл жолы Светлана Анкичева (50 кило), Эмма Тисина (57 кило) және Диана Каюмованың (57 кило) бағы жанды. Сондай-ақ қызылордалық Асылзат Сағымбай (53 кило), шымкенттік Айша Уәлишан (55 кило), Гаухар Мұқатай (65 кило) және Валерия Гончарова (72 кило) сынды арулар алтын медальді мойындарына ілді.

Күннің маңызды және өзекті жаңалықтарын «Егемен Қазақстан» телеграм каналынан оқыңыз