«Жақсылық етсең жасыр, жақсылық көрсең асыр» деуші еді атам қазақ. Үндеместен үлкен іс тыдырып жүрген жастардың игі шаруаларын айтпай қалуға болмас. Әсіресе биыл, аты жаман індет елді үрейлендірген тұста тарбағатайлықтардың ұйымшылдығына көпшілік қызыға қараған. Дендеген дертке төтеп беруі үшін бәрі бір атаның баласындай ортақ қазанға қаржы жинап, ауданның ауруханаларына өкпені жасанды желдету аппараттарынан бастап ұсақ-түйек керек-жарақтарына дейін алып бере қойған. Ұйымшылдық деген сол емес пе?!
Сондай-ақ волонтерлер Екпін, Құмкөл және Ақсуат ауылдарындағы жалғызбасты аналардың баспаналы болуына көмектескен. Жаңаауылда жастар демеушілігімен ауылдың бір көшесіне жарық тартылды. Енді бұл ауылда «Жастар үйіне» жөндеу жұмыстары жүргізіліп, ауылдық округ әкімдігінің балансына берілмек.
Аудандағы «Барқытбел жастары» қоғамдық бірлестігі биыл ауылдық жерлердегі үкіметтік емес ұйым әлеуетін арттыру мақсатында ұйымдастырылған гранттық жобаға қатысып, 500 мың теңге грантқа ие болған. Олар ұтып алған қаржыға жастарға арналған «Коворкинг» орталығын ашуды қолға алған. Сонымен қатар ұйым жастары мүмкіндігі шектеулі жандарға, қарттарға, жалғызбасты аналардың үйлеріне әр сенбі сайын жәрдемдесіп, қайырымдылық акциясын ұйымдастыруды дәстүрге айналдырған.
Төтенше жағдай кезінде «Барқытбел жастары» волонтерлер тобы аудан тұрғындарының қауіпсіздігі үшін ақпарат материалдары мен тегін маскалар таратты. Санитарлық бекеттерде тұрған қызметкерлерге тамақ апарып беріп жүрді. Қайырымды жастар төтенше жағдай кезінде мүмкіндігі шектеулі жандар мен қарттарды да азық-түлікпен қамтамасыз етіп отырды.
Тұрғындарға пайдалы ақпарат тарату мақсатында әлеуметтік желіде «Жастар орталығы» атты парақша ашылып, азаматтар мазалаған сұрақтарына жауапты сол жерден тапқан.
Аудандағы белсенді жастар арасында волонтерлік жұмыстардан бөлек мемлекеттік Нәтижелі жұмыспен қамту және жаппай кәсіпкерлікті дамытудың 2017-2021 жылдарға арналған бағдарламасы арқылы бизнес ашуды көздегендер де бар. «Жас кәсіпкер» жобасы аясында 20 жас грант алуға үміткер және 13 жас «Бастау» жобасына қатысқан. Алдағы уақытта 150 жасты кәсіптік мамандық игеруге оқыту жоспарланып отыр. Сонымен қатар, BIRGEMIZ жобасы аясындағы гранттық жобаға 3 жоба ұсынылды. Соның бірі «Біргеміз Асыл мұра» жобасы аясында Назерке Қызырова грант ұтып алып, тарихи-мәдени орындарға волонтерлерді тарту жұмыстарын жүргізіп жатыр. Жазғы маусымда жоба аясында волонтерлер Елеке сазы жайлауына экскурсияға барып, туған жер тарихымен танысып қайтты. Жобаның негізгі көздегені, Тарбағатай шекаралық аймаққа жататындықтан жастарды ауданға тартып, аудан халқының санын арттыру.
– Жас маман тың идеяларымен ауданға келіп жатса, кадр тапшылығы болмас еді. Ауданның әлеуметтік-экономикалық ахуалы жоғарлайды. Жалпы жастардың ауданда да өсіп-өркендеуіне жағдай жасалған, – дейді жоба жетекшісі Назерке Қызырова.
Тарбағатай таланттардың жері. Жуық арада жас өнертапқыштарды қолдау мақсатында Tarbagatai inventor атты жас өнертапқыштар көрмесін өткізу жоспарланып отыр.
Шығыс Қазақста облысы,
Тарбағатай ауданы
