Қарт спортшы қатардан қалмай келеді

Спорт • 25 Қараша, 2020

Қарт спортшы қатардан қалмай келеді

25 рет көрсетілді

Бауыржан Құлжановтың есімі солтүстікқазақстандықтарға жақсы таныс. Ол классикалық күрестен КСРО спорт шебері, қазақ күресінен Солтүстік Қазақстандағы бірінші спорт шебері, облыстық күрес федерациясының президенті. Өз салмақ категориясы бойынша Қазақстанның бірнеше дүркін чемпионы.

Жақсыбай САМРАТ

Суретте: Спорт шебері Бауыржан Құлжанов өз үйіндегі музейін таныстырып тұр.

Спорттың, оның ішінде күрестің облыстағы дамуына өзіндік үлкен үлес қосқан азамат. Кезінде ол Петропавл қалалық партия комитетінде қызмет істеген екі қазақтың бірі болған еді. Бұл жерде де ол денешынықтыру мен спорт саласының дамуын қадағалаған. Өз ісіне берік және білікті азаматтың ұлттық намысы да жоғары болды. Ол солтүстікте қазақ күресінің дамуына зор еңбек сіңірді.

Біз қаладағы жалғыз қазақ мектебінде оқып, жасөспірімдердің спорт мектебіндегі күрес секциясына қатысып жүргенде Бауыржан Құлжанов ағамызды жиі көретінбіз. Ол сол тұста күресте ғана емес, өмірде де ешкімге есесін жібермейтін қызуқанды азамат болып көрінетін.

Еліміздің тәуелсіздік алған жылдарында жаңадан құрылған, бұрын болмаған кеден қызметін де Бауыржан Құлжанов басқарды. Осында қызметтен қол үзбей жүріп, Ресейдің Кеден академиясын да алғашқылардың бірі болып сырттан оқып бітірді. Одан әрі Жамбыл облыстық кеден басқармасының бастығы болып, кеден қызметінің полковнигі дәрежесінде зейнет демалысына шықты.

Қазір оның атында облыста жыл сайын күрестен жарыстар өткізіліп тұрады. Ол Петропавл қаласы мен Аққайың ауданының Құрметті азаматы. «Мен қазақ күресімен айналыса бастаған жылдарда бұл күрес бізде мүлде дамымаған еді. Бірақ маған оның әдіс-тәсілдері соншалықты жақын болды. Сондықтан олардың көбін айнаға қарап отырып, өздігімнен игеріп кеттім. Сол жылдары алғаш рет Шымкентте республикалық жарыс болып, облыстан соған жалғыз өзім барып, бірінші орын алып қайтқан едім», деп еске алады Бауыржан Ниязұлы. Ал қазір біздің облыста күрестің осы түрімен мыңнан астам жас айналысады.

Кеден қызметіне келгенге дейін Бауыржан Құлжанов ішкі істер органдарында қызмет істеген еді. Жаңа қызмет алғашында осы органның базасында құрылған. Сол жылдары Баукең ішкі істер органдарының «Динамо» спорт қоғамын басқарды. Сондықтан да оны қазір «Динамо» спорт қоғамы өзінің ардагері деп санайды.

Биыл «Динамо» спорт қоғамының республикалық Орталық кеңесі денешынықтыру мен спортты насихаттау мақсатымен осы тақырыпқа түсірілген БАҚ өнімдеріне байқау жариялаған болатын. Соның ішінде Солтүстік Қазақстан облысы Полиция департаментінің баспасөз қызметі «Спортсыз күнім жоқ» деген бейнеролик түсіріп, конкурсқа қатысқан. Бұл тұтасымен «Динамоның» ардагері Бауыржан Құлжановтың бүгінгі спорттық өміріне арналған шағын фильм еді. Өзінің спортпен біте қайнасқан өмірі туралы айтқан қарт спортшының әңгімелері өте тартымды болып, оны әлеуметтік желілерде 1700-ден астам адам қараған. Сөйтіп, осы шағын бейнеролик республикалық конкурста екінші орын алып, оны түсірушілер мен басты кейіпкерін ғана емес, барша солтүстікқазақстандықтарды қуанышқа бөледі.

«Бауыржан Құлжанов Солтүстік Қазақстан спортының еңбек сіңірген ардагерлерінің бірі», – дейді ДШСҚ облыстық филиалы төрағасының бірінші орынбасары Талғат Туғанбаев. – Ол жас кезінде-ақ ұлттық спорт – қазақ күресінен спорт шебері атанды. Комсомол ұйымында, кейін полицияда жұмыс істеді, «Динамо» төрағасының орынбасары болды, кеден қызметінің полковнигі шенінде зейнетке шықты. Байқау жарияланған кезде біз ойланбастан бейнероликтің кейіпкері болуға Бауыржан Ниязұлын таңдадық. «Спортсыз күнім жоқ» қағидасын ол өз бойына сіңірген адам. Ол барлық уақытта да жаттығуды тастаған емес. Қазірдің өзінде ауа райының қолайсыздығына да қарамастан жүгірумен айналысып, көшедегі тренажерлердің жанынан тоқтамай өте алмайды».

Бауыржан Құлжанов өз үйінде Солтүстік Қазақстан спортының нағыз жеке мұражайын жинақтады. «Спорт менің қанымда бар және бұл бекер айтылған сөз емес», дейді өзі.

Жақында оған республикалық конкурстың қорытындысы бойынша берілген «Динамо» ДШСҚ Орталық комитетінің II дәрежелі дипломы тапсырылды. Жүлде облыстық полиция департаментінің аппараттық жиналысында тапсырылды. Департамент бастығы, полиция полковнигі Марат Төлебаев спортты кеңінен насихаттауға қосқан үлесі үшін бейнероликті жасаған «Динамо» ДШСҚ СҚОФ бас маманы Галина Скорых пен СҚО ПД ішкі және сыртқы коммуникациялар бөлімінің бас маманы Ерлан Махметовке де Алғыс хаттар тапсырды.

Солтүстік Қазақстан облысы