Облыста жыл басынан бері 646 мәрте оқыстан от шығып, жалын шарпып, сумаңдаған өрт тілі талай дүниені жалмап кетті. Жалғыз материалдық игілік қана емес, адам шығыны да бар. Айтпай келген апаттан 3,5 мыңнан астам адам материалдық шығынға душар болды. Ең өкініштісі, есепті кезеңде төтенше оқиғалардан 105 адамның қайтыс болуы – орны толмас қайғы-қасірет. Төтенше жағдайлар департаментінің бөлімшелері азаматтарды апаттан құтқару үшін 1330 мәрте сапарға шыққан.
Орын алған оқиғаларды ақыл таразысына салып екшесеңіз, ең алдымен қауіп-қатері мол қыраулы қыста жолаушылардың күні бұрын жасалған ескертуге қарамастан, жолға шығатындығында. Өткен қыста қар кептелісінде айдалада қалған адам өте көп болды. Өздері де бейнет шекті, өзгені де әуре етті. Негізінде осы оқиғалардың орын алуына кінәлі ескертуді елемейтін адамдардың өздері. Ауа райының бұзылып келе жатқанын көре тұрып тәуекелге бел буып, жолға шығады. Ал тілсіз табиғатпен тайталасу үнемі жеңіспен аяқтала бермейді. Сондықтан ескертуге құлақ асқан да абзал.
Екінші бір жай – өрттің алдын алмау. Жыл басынан бері өрт қауіпсіздігі талаптарын бұзудың 2490 фактісі анықталып отыр. Егер алдын алу жұмыстары жүргізілмесе, тағы қаншама қайғы-қасірет орын алар еді. Тексеріс нәтижесі бойынша 550-ден астам адам әкімшілік жауапкершілікке тартылған. Сөз арасында азаматтық қорғаныс бағыты бойынша 129 адамға айыппұл салынып, 429 адамға ескерту жасалған. Салынған айыппұлдың 4 млн 709 мың теңгесі өндіріліп алынған.
Қызыл тілі сумаңдаған өрт өндірістік және тұрмыстық бағыттағы нысандарды да шарпып тұр. Жыл басынан бері 631 мәрте өрт оқиғасының орын алуы адамдардың әлі де талап пен тәртіпке мойынсұна қоймағанын көрсетеді. Өрттен келген шығын да қомақты, 130 млн теңгенің шамасында. Ең бастысы, 22 адам төтеннен келген оқиғаның кесірінен өмірімен қоштасты, 9 адам жарақат алды. Мамандардың сараптауына қарағанда, тұрғындар отты пайдаланғанда қауіпсіздік шараларын сақтай бермейді. Тұрмыстық электр аспаптарын пайдалануда да өрт қауіпсіздігі ережесі жиі бұзылады. Сөзімізге дәлел ретінде жыл басынан бері тұрғын үй секторында 448 мәрте өрт оқиғасы орын алғандығын айта кетуіміз керек.
Қылышын сүйретіп қыс келе жатыр. Қыраулы қыста қатерлі оқиғалар көбеюі де әбден мүмкін. Өйткені жекеменшік секторда тұрғын үйлерді жылыту үшін пеш жағылады. Төтенше жағдайлар департаменті бейқамдық салдарынан тұрғындарды өртті пайдалану кезінде 217 рет абайсыздан өрт шығарып алған фактілерін тіркеген. Пеш пен мұржаны пайдалануда өрт қауіпсіздігі ережесі 73 мәрте бұзылыпты. Сондай-ақ электр қондырғыларды монтаждау және техникалық пайдалану ережесі де сақтала бермейді. Осы жылдың қаңтар және ақпан айларында 6 бірдей адам өмірден өтті. Оның ішінде бес оқиғада мастықтың салдарынан төсегінде темекі тартып жатып өрт шығарып алып, орны толмас оқиғаға душар болған. Тұрмыстық электр аспаптарын пайдалану кезінде өрт қауіпсіздігі ережесі бұзылуының салдарынан үш бірдей адам қайтыс болған.
– Тұрғын үй секторындағы өртті азайту мақсатында департамент жылу беру және жазғы өрт қаупі бар тұста үгіт-насихат жұмыстарын күшейтеді. Карантин шаралары кезінде қауіпсіздік ережелерін таратуға үй-үйді аралап, түсінік жұмыстарын жүргізуге мүмкіндік болмады. Тек бұқаралық ақпарат құралдары мен әлеуметтік желілерде ғана алдын алу жұмыстарын жүргіздік, – дейді облыстық төтенше жағдайлар департаментінің бастығы, азаматтық қорғаныс полковнигі Алексей Советов.
Департамент мамандары 264 мың адамға кеңес берген. Алдағы уақытта осындай кеңестерге құлақ асып, сақтық шараларын сақтаса, қауіп-қатерге жол бермес еді.
Ақмола облысы
