Бейнеконференция форматында өткен форумға Еуропалық парламент, ТүркПА, Вьетнам, Италия, Ресей, Түркия, Қытай, Өзбекстан, Чехия парламенттерінің басшылары мен депутаттар қатысты.
Отырысты ашқан Мәжіліс Төрағасы Нұрлан Нығматулин Қазақстанның Тұңғыш Президенті Нұрсұлтан Әбішұлы Назарбаевтың Тәуелсіз Қазақстанды және оның парламентаризмін қалыптастыру жолындағы теңдессіз рөліне тоқталды.
Мәжіліс Төрағасы атап өткендей, Елбасы елімізді барлық қиындықтан аман алып шығып, ірі саяси, экономикалық әлеуметтік реформалар жасады. Мемлекетімізді әлемдік деңгейге жеткізді. «Қазақстандық даму жолы» қалыптасты. Сондықтан шын мәнінде, «Тәуелсіздік жолы – Елбасы жолы». Осы даму жолымыз қазір Президент Қасым-Жомарт Тоқаевтың басшылығымен одан әрі жалғасуда. Н.Нығматулин осы үлкен жолда тәуелсіздік тарихымен бірге келе жатқан қос палаталы Парламенттің де үлесі зор екенін баса айтты.
– Бүгінде біздің кәсіби Парламент қоғамдық пікірлер мен ашық саясаттың биік мінбері болумен қатар, мүмкіндігі мол, қуаты мықты, жоғары заң шығарушы органға айналды. Өзіне жүктелген әрбір міндетті абыроймен атқарып, Елбасы Нұрсұлтан Әбішұлы Назарбаевтың және Мемлекет басшысы Қасым-Жомарт Тоқаевтың маңызды қадамдарын, саяси, экономикалық, әлеуметтік бастамаларын сапалы заңдармен қамтамасыз етіп келеді, – деді.
Сонымен қатар палата спикері Қазақстан Парламентінің өркениетті елдердің заңнамалық органдарымен тең дәрежеде қызмет етіп, Елбасы айтқандай, нағыз демократия мектебіне айналғанын жеткізді. Нұрлан Нығматулиннің пікірінше, осының барлығы, Тұңғыш Президентіміз Нұрсұлтан Әбішұлы Назарбаевтың ел басқарудағы дана, көреген, сындарлы саясатының жемісі.
Конференция барысында Қытай Халық Республикасы Бүкілқытайлық халық өкілдері жиналысы Тұрақты комитетінің төрағасы Ли Чжаньшу Қазақстанның Тұңғыш Президенті – Елбасы Нұрсұлтан Назарбаевтың мемлекетті қалыптастыру, оның саяси жүйесін жетілдіру және тұрақтылықты қамтамасыз ету жолындағы ерен еңбегіне тоқталды.
– Нұрсұлтан Назарбаев – Халықаралық қоғамдастықтағы беделді саясаткер болумен қатар, қытай халқының тілеулес досы ретінде ұзақ уақыттан бері Қытай мен Қазақстанның ынтымақтастығын нығайтып, Қытайда жоғары беделге ие болып келеді, – деді Қытай парламентінің спикері.
Ал Ресей Федерациясы Мемлекеттік думасының спикері Вячеслав Володин Нұрсұлтан Назарбаевтың парламентаризмді дамытуда да, Қазақстан мен Ресей арасындағы екіжақты қатынастарды нығайтуда да, еуразиялық кеңістікте халықаралық ынтымақтастықты ілгерілетуде де, Шанхай Ынтымақтастық Ұйымы, Ұжымдық қауіпсіздік туралы шарт ұйымы сияқты бірқатар халықаралық ұйымдар шеңберінде интеграциялық процестерді арттыруда да маңызды рөлін атап өтті.
В.Володинның айтуынша, Нұрсұлтан Назарбаев бүкіл өмірін өз еліне және халқына қызмет етуге арнаған тұлға. Тұңғыш Президенттің үлкен еңбегі – осы жылдар ішінде мемлекет нық дамып, экономикалық, әлеуметтік және ғылыми-техникалық салаларда табыстарға жетуде.
– Нұрсұлтан Назарбаевтың саяси даналығы, бай өмірлік және басқарушылық тәжірибесі Ресей мен Қазақстан арасындағы қатынастарды дамыту ісінде, халықтарымыз арасындағы достықты нығайтуда, Еуразиялық кеңістікте көпжақты ынтымақтастықты ілгерілетуде ұзақ жылдар бойы сұранысқа ие болады, – деді Ресей Федерациясы Мемлекеттік думасының спикері.
Түркияның Ұлы Ұлттық Мәжілісінің Төрағасы Мұстафа Шентоп Қазақстанның Тұңғыш Президенті Нұрсұлтан Назарбаевтың бастамалары бүкіл әлем үшін зор маңызға ие деп санайды.
– Қазақстанның үдемелі дамуында Елбасы Нұрсұлтан Назарбаевтың демократияны, адам құқықтарын және заңның үстемдігін дамыту жолында қолға алған қадамдары маңызды орын алатыны сөзсіз, – деді Түркия парламентінің өкілі.
М.Шентоп өз сөзінде Нұрсұлтан Назарбаев мықты көшбасшылық қасиеттермен қатар демократияны нығайтып, Қазақстанды жаңғырта білген, ерік-жігер танытқан сирек кездесетін саясаткерлердің бірі екеніне ерекше тоқталды. Түрік парламентінің өкілі конференцияда талқыланған мәселелердің өзектілігі мен маңыздылығын назар аударып, Қазақстанның Тұңғыш Президенті Нұрсұлтан Назарбаевтың парламентаризм мен парламенттік мәдениетті дамытуға қосқан үлесін де айрықша атап өтті.
Сонымен қатар Өзбекстанның Олий Мәжілісі заң шығару палатасының Спикері Нурдинжон Исмоилов қазақстандықтарды Тұңғыш Президент күнімен құттықтап, бұл мерекені Өзбекстан мен Қазақстан арасындағы стратегиялық әріптестіктің беріктігі мен тиімділігін бағалаудың тамаша мүмкіндігі деп атады.
Халықаралық конференцияда сөз сөйлеген Нурдинжон Исмоилов Қазақстанның Тұңғыш Президенті Н.Назарбаевты Қазақстан мемлекетін құрудың бастауында тұрған көрнекті тұлға екенін атап өтті.
– Оның стратегиялық бағытының арқасында Қазақстан Тәуелсіздіктің 30 жылы ішінде жоғары нәтижелерге қол жеткізді. Қазақстан Республикасының Тұңғыш Президенті күнін мерекелеу Өзбекстан мен Қазақстан арасындағы стратегиялық серіктестік тамырын тереңдете түседі, – деді Өзбекстанның заң шығару палатасының спикері.
Нурдинжон Исмоиловтың айтуынша, қос ел арасындағы стратегиялық өзара байланыс дәстүрлі түрде жоғары деңгейде әлемдегі қазіргі эпидемиялық жағдайға қарамастан, қарқынды дамып келеді. Осылайша, Өзбекстанның заң шығару палатасының спикері екі ел арасындағы парламентаралық ынтымақтастықты жоғары бағалап отыр.
– Біздің еліміз әрдайым әлемнің барлық елдерімен сындарлы диалогты дамытуға, парламентаралық өзара іс-қимылды нығайтуға деген ұмтылысымен ерекшеленді. Бүгінде халықаралық ынтымақтастықтың тиімді тетіктерін құруда және аймақтық, құрлықтық деңгейде ортақ шешімдер табуда парламенттік дипломатияның айтарлықтай әлеуеті бар екендігі анық. Біз жаңа көзқарастар мен идеяларға әрқашан дайынбыз. Бүгінгі конференция бізге бірегей тәжірибе мен пікір алмасуға мүмкіндік берді. Біз бірлесіп заманымыздың жаңа жағдайдағы мәселелерін шешудің әмбебап тетіктерін жасай аламыз. Сондықтан қазақстандық парламенттің депутаттық корпусы атынан конференцияның барлық қатысушыларына жемісті жұмыс, қызықты әрі табысты пікірталастар, жаңа идеялар тілеймін, – деп түйіндеді жиынды Н.Нығматулин.