Аймақтар • 04 Желтоқсан, 2020

Ауыл шаруашылығының үздіктеріне "МТЗ-82.1" тракторы берілді

202 рет көрсетілді

Бүгін облыс әкімі Амандық Баталов өңірдегі агроөнеркәсіп кешені еңбеккерлерін құттықтап, бірқатар марапатты тапсырды. Шара онлайн режімде өтіп, аудан, қалалардың өкілдері жиынға бейнебайланыс арқылы қатысты, деп хабарлайды Egemen.kz Алматы облысы әкімінің баспасөз қызметіне сілтеме жасап.

Облыс басшысы өңір халқының 80%-ы ауылдық жерлерде тұратындықтан аграрлық саланың дамуы халықтың әл-ауқатымен тығыз байланысты екенін тілге тиек етті. Облыстың басымдық беретін дақылдарын өсіру, өңдеу ісін дамыту, инвестиция тарту сияқты көптеген осы саладағы негізгі бағыттардың аяқ алысына, ауыл шаруашылығы саласындағы жаңалықтар мен жетістіктерге қысқаша тоқталды.

1

"2020 жыл коронавирус індетіне байланысты оңай болған жоқ. Мемлекет басшысы Қасым-Жомарт Кемелұлының тапсырмасына сәйкес Үкімет дер кезінде қолдау шараларын қабылдады. Соның арқасында көктемгі егіс жұмыстары уақытылы жүргізілді. Облысқа көктемгі егіс жұмыстарына "Аграрлық несие корпорация" арқылы берілген 1,1 млрд теңге жеңілдетілген несие көп көмек болды. Егіс алқабының көлемі 7 мың гектарға артып,  968 мың гектарға жетті. Ауа райының қолайсыз болғанына қарамастан облыс еңбеккерлерінің тынымсыз еңбегінің арқасында 1,4 млн тонна дәнді дақылдар жиналды. Жүгерінің шығымы  гектарына 67,2 центнерден болып, 581 мың тонна өнім жиналды. Қант қызылшасы биылғы жылы орта есеппен гектарынан 380 центнерден алынды.Жекелеген шаруашылықтарда бұл көрсеткіш 600-800 центнерге жетті, 550 мың тонн өнім жиналды, бұл өткен жылмен салыстырғанда 25 мың тоннаға артық. Биыл 50 мың тонна ақ қант алу жоспарланған. Осы ретте өңірдегі қызылша өсірушілерді қолдау мақсатында 2021 жылдан бастап өңдеуге өткізілген өнімнің әр тоннасына берілетін сусидия көлемін 10 мың теңгеден 12 мың теңгеге өсіреміз", деп атап өтті А. Баталов.

Сондай-ақ облыс әкімі өз сөзінде мал шаруашылығын өркендету, ирригациялық жүйелерді қалпына келтіру, салаға стратегиялық инвесторлар тарту мәселесіне де тоқталды. Мәселен, америкалық "Тайсон фудс" компаниясының ірі қара етін өңдейтін зауыты, германиялық инвестор "Бауман" компаниясының ұсақ мал етін тереңнен өңдейтін жобасы қолға алына бастады. 7 жыл тоқтап тұрған, қуаты  29 мың тонна  болатын "Отан Грин Фуд" құс фабрикасы қайта жаңғыртылуда.

"Ауыл шаруашылығына тартылған инвестиция көлемі 50,9 млрд. теңгеге жетті, жыл басынан 25 инвестициялық жоба іске қосылды. Жалпы қабылданған шаралар нəтижесінде жыл соңына қарай ауыл шаруашылығы өнімінің жалпы көлемі 900 млрд. теңгеге жетеді. Біз бұл табыстармен тоқтап қалмаймыз. Келесі жылы бұл көрсеткішті 1 трлн. теңгеге жеткіземіз деп жоспарлап отырмыз. Біздің бүгінгі мақсатымыз – Президентіміздің Агроөнеркәсіп кешеніндегі еңбек өнімділігін жəне ауыл шаруашылығы өнімдерінің экспортын 2,5 есе арттыру туралы тапсырмасын орындау. Ол үшін бізде барлық жағдайлар бар, соның ішінде ең бастысы еңбекқор əрі жауапкершілігі мол адамдар – біздің басты байлығымыз. Сіздер, аграрлық саланың мамандары, өздеріңіздің күнделікті тынымсыз еңбектеріңіздің арқасында азық-түлік қауіпсіздігін қамтамасыз етіп, халықтың əл-ауқатын арттыруға, жалпы елдің дамуына зор үлес қосып келесіздер. Қажырлы еңбектеріңіз үшін Сіздерге алғыс айтамын", деп сөзін қорытындылады А. Баталов.

1

Осы жиында облыс әкімі бірқатар азаматтарға марапат тапсырды. Атап айтқанда, Ауыл шаруашылығы министрлігінің "Еңбек ардагері" медалімен Ақсу ауданындағы "Марлен-А" ЖШС-нің жетекшісі Мұсеке Әміров, Ескелді ауданынан "Романенко В.В" ШҚ-ның басшысы Виктор Романенко, сарқандық "Самал" ШҚ басшысы Ермек Қалиев марапатталды. Сол сияқты өткен жылдың қорытындысы бойынша ауыл шаруашылығы саласында Балқаш ауданындағы "Агрофирма Бірлік" ЖШС үздік деп танылып, оның директоры Алмас Қыстаубаевқа І дәрежелі диплом мен "МТЗ-82.1" тракторының кілті берілді. Дәл осындай сыйлық шаруа қожалықтары арасында үздік атанған Жамбыл ауданының "Шалтабаева Ж.Е" шаруа қожалығына тапсырылды. Марапатты қожалық өкілі Талант Сеңгірбаев алды. Жиында сөз алған "Агрофирма Бірлік" ЖШС директоры Алмас Қыстаубаев серіктестіктің жұмысы туралы азды-кем айтып өтті. Оның айтуынша, ұжымның еселі еңбегінің және мемлекеттің жанды қолдауының арқасында биыл 4600 тонна күріш, 7200 тонна астық жиналған. 250 адам еңбек ететін серіктестік ірі және ұсақ мал санын қазір 10 мыңға жеткізген. Малдың жем-шөбі дер кезінде дайындалған, қиындық жоқ. Өнімдерін экспортқа шығаруға ниетті. Қайырымдылықпен де айналысып, көп балалы отбасыларына азық-түлік жағынан көмектесіп тұрады. А. Қыстаубаев еркін еңбек етуге мүмкіндік жасап, барынша қолдау көрсеткен ел басшылығына ризашылығын білдіріп, әріптестерін кәсіби мерекелерімен құттықтады.  

Сонымен қатар "Шалтабаева Ж.Е" шаруа қожалығының өкілі Талант Сеңгірбаев та пікір білдіріп, құттықтау сөз сөйледі.

Ары қарай ауыл шаруашылығы қызметкерлерінің күніне орай марапаттау рәсімдерін жергілікті жерлерде аудан, қала әкімдері жалғастырды.

Соңғы жаңалықтар

«Барыс» «Витязьді» ұтты

Спорт • Бүгін, 16:15

Құнсыздық құлдың түбіне жетеді

Аймақтар • Бүгін, 14:39

Пневмониядан 2 адам қайтыс болды

Коронавирус • Бүгін, 11:42

Биатлоншылардың бағы жанбады

Спорт • 22 Қаңтар, 2021

Ұқсас жаңалықтар