Алматылық құқық қорғаушылар таяуда осындай бір шикіліктің шетін байқап, жауапкершілігі шектеулі серіктестіктің білдей бір директорын аса ірі көлемде алаяқтық жасады деген күдікпен ұстады. Полиция департаменті мәлім еткендей, күдікті қаржылық сауат арттыру бойынша семинарлар өткізіп, өзіне имандай ұйыған жұртты қаржы көзін пайдалы акцияларда сақтау керек деп сендірген. Қазіргі таңда оның қылмыстық әрекетінен зардап шеккен 725 адам анықталып отыр. Сонымен қоймай ол биржалық саудамен айналысатын жалған компаниялар мен сайттар әзірлеумен шұғылданыпты.
– Күдікті әйел мұндай әрекетімен іс жүзінде ұзақ уақыт айналысқан адам ретінде әдемі және сауатты сөйлегендіктен, келушілер оған сенген. Алданған азаматтарға ол акционер болуды және биржалық саудалық активтерге инвестициялау арқылы ақшаларын көбейтуді ұсынған. Жоспар бойынша салымшылар салынған қаражаттан 40% пайда алуы керек болатын. Идеяны жүзеге асыруға виртуалды платформа қажет болған және ол үшін «инвесторларға» логин мен пароль беріліп, электронды әмиян тіркелген «itrade» сайты қолданылған. Олар іс жүзінде өздері салған қаражаттың және алынған кірістің сомасын көргенімен, бұл тек монитордағы сандар ғана еді. Инвестиция белсенді «қаржыгердің» қалтасына түсіп отырған, – дейді Алматы қалалық полиция департаменті тергеу басқармасы бастығының орынбасары Мұхамедәлі Сейсенұлы.
Тергеу барысында азаматтардың инвестиция ретінде 500-ден 30 мың АҚШ долларына дейін ақша салғаны анықталды. Салымшылардың ешқайсысы уәде етілген соманы ала алмаған. Қаржылық сауатты үйретіп жүрген азаматша бастапқыда алынған ақшаны төлеуді және қайтаруды жоспарламапты да. Құзырлы орынның болжамынша, оның қылмыстық әрекетінен 2019 жылдың қаңтарынан бастап жәбірленушілерге жалпы сомасы 180 мың доллардан астам материалдық шығын келген.
«Іс жүзінде зардап шеккен азаматтардың саны әлдеқайда көп болуы, келген шығын мөлшері бұдан да жоғары болуы мүмкін. Күдікті сайтта жоғары кірісті пайда тапқысы келетіндерді белсенді пайдаланған. Қазіргі таңда Қылмыстық кодекстің 190-бабы 4-бөлігінің 2-тармағымен сотқа дейінгі тергеу жүріп жатыр. Бұрын осыған ұқсас қылмыстары үшін қылмыстық жауапкершілікке тартылған, 1974 жылы туған азаматша Алматы қаласының уақытша ұстау изоляторына қамалды», деп мәлімдеді тергеу басқармасының өкілдері.
АЛМАТЫ
