Санитарлық-эпидемиологиялық талаптар қадағаланған штаб жанындағы байқаушылар мектебінде барлығы 250 адам оқытылды. Семинар-тренингтерде тәжірибелі сарапшылар мен заңгерлер ҚР сайлау туралы Конституциялық заңы, байқаушының құқықтары мен міндеттері және мінез-құлық кодексі туралы түсіндіріп берді. Сонымен қатар, дауыс беру күні учаскедегі фото және бейне түсірілімнің ерекшеліктері, байқау процесін құжаттамалық сүйемелдеу туралы да және тағы басқа қажетті кеңестер айтылды.
Қалалық штабтың басшысы Төлеген Күнәділовтің айтуынша, жуық арада байқаушыларға арнайы дайындалған сайлау учаскесінде алған білімдерін іс жүзінде қолдану үшін практикалық жұмыстар жүргізіледі. Келесі аптада байқаушыларды сайлау учаскелеріне бекіту жұмыстары аяқталмақшы.
Сондай-ақ, байқаушыларға пандемия кезіндегі сақтық шаралары жөнінде түсіндіру жұмыстары жүргізіліп, дауыс беру күні қарсаңында жеке қорғаныс құралдары беріледі.
