М.С.Бақбергенов Тәжік КСР-інің Қорғантөбе облысында дүниеге келді, өзінің борышын кеңес әскерінде өтеп, ұлттық шаруашылықта жұмыс істеді. Жеке қайсарлығы мен еңбексүйгіштігі арқасында халықаралық қатынастар мамандығы бойынша Мәскеуде оқып, Шығыс елдерінің референті біліктілігін алды.
М.С.Бақбергенов Тәжік КСР-інің Қорғантөбе облысында дүниеге келді, өзінің борышын кеңес әскерінде өтеп, ұлттық шаруашылықта жұмыс істеді. Жеке қайсарлығы мен еңбексүйгіштігі арқасында халықаралық қатынастар мамандығы бойынша Мәскеуде оқып, Шығыс елдерінің референті біліктілігін алды.
Мұқан Сәрсенұлы Тәуелсіз Қазақстанның Ауғанстандағы дипломатиялық өкілдігінің алғашқы басшысы еді. Екі ел арасындағы дипломатиялық байланыстар дәл оның тағайындалуынан кейін басталды деуге болады. Қазақстан азамат соғысын басынан кешкен Ауғанстанды қалпына келтіру және дамыту бойынша халықаралық қауымдастықтың іс-әрекетін қолдап, оған белсенді атсалысты. Бұл шара осы елден шығатын лаңкестік, экстремизм мен есірткі бизнесін Қазақстанда болдыртпау үшін қажет еді.
Осы жерде Мұқан Сәрсенұлының қысылтаяң жағдайлардан жол таба білетін жеке және іскерлік қасиеттері айрықша көрінді. Ол біздің дипломатиялық миссиямыздың ұзақ мерзімге жұмыс істеуіне тиісті жағдай жасады. Күйзелісті ахуалдың салдарынан ауған үкіметінің Қазақстанның елшілігіне ғимарат беру мүмкіншілігі болмады. Оның үстіне, Кабулда біздің дипломаттар тұра алатын қонақ үй, немесе тиісті жекеменшік үй де болмады. Мұқан Сәрсенұлының тәжік дипломаттарымен достық қарым-қатынасының арқасында, Қазақстан дипөкілдігінің қызметкерлері алғашқы уақытта сол елдің елшілігінде тұрып, жұмыс істеді.
Кабул қаласындағы Қазақстан елшілігі қызметкерлерінің ұйымдастыруымен өткізілген ас беруде Мұқан Сәрсенұлы туралы көптеген жылы сөздер мен еске алулар айтылды. Мәселен, АИР Парламенті төменгі палатасының депутаты Боз Мохаммад Джаузджани ауған парламентарийлері тобы атынан сөйлеген сөзінде, екіжақты байланыстарды үлкен табандылықпен орнатқан М.Бақбергеновтің өмірлік ұстанымдарын, белсенділігін айрықша атап өтті. Қазақстандық дипломат Ауғанстанның билік және басқару органдарында лайықты беделге ие еді, деді ол.
Ауғанстандағы қазақ диаспорасының ақсақалы Мамур Жалил тарихи Отанына 200 этностық қазақты көшіруді ұйымдастыруға Мұқан Сәрсенұлының жеке қатысқанын ризашылықпен айтып өтті. Ауғанстан мен Қазақстан арасында тығыз байланыс орнатуға үлкен үлес қосқан дипломатты ауғандықтар осы күнге дейін ықыласпен еске алады. Мұны М.Бақбергеновпен ұзақ уақыт бойы достық және іскерлік өзара байланыста болған Ауғанстанның Қазақстан Республикасындағы бірінші елшісі Азизулла Рузи де әңгімесіне арқау етті. Қазақстанның Ауғанстанға жіберген бірінші гуманитарлық көмегі мен екі елдің іскерлік топтары арасында қарым-қатынастар орнату дәл осы Қазақстан дипломатының атымен тығыз байланысты, деді А.Рузи өз сөзінде.
Тәжікстанның Ауғанстандағы елшісі Шарафуддин Имомов күні бүгінге дейін күрделі кездерді бастан кешіп отырған Ауғанстанға М.Бақбергеновтің 2003 жылы келгенін еске алды. Шетелдік дипломаттар мектеп пен ауруханалардың болмауы сияқты тұрмыстық проблемаларға душар болатын, олардың жұмыстары да айтарлықтай қауіп-қатерлерге толы еді.
Мұқан Сәрсенұлымен тығыз қатынасқан БҰҰ миссиясының Ауғанстандағы жетекші қызметкері Талатбек Масадыков та қазақстандық дипломаттың осы елдегі ішкі қоғамдық-саяси және әлеуметтік-экономикалық жағдайды, жергілікті халықтың ділін, мінез-құлқы мен ойлау стереотиптерін жақсы меңгергенін атап өтті. Осының бәрі М.Бақбергеновтің Кабулда жемісті қызмет етуіне мүмкіндік берді, деді ол.
«Кам Групп» компаниясының президенті З.Камгар атап өткендей, М.Бақбергенов ауған іскерлік топтарының ішінде құрмет пен абыройға ие болған. Сауда-экономика саласындағы екіжақты қатынастар осы кісінің белсенді қатысуымен айтарлықтай өскен. Ауғанстан сауда және өнеркәсіп министрінің міндетін атқарушы Ш.Каргар Мұқан Сәрсенұлының екі ел арасындағы түрлі салалардағы ынтымақтастықтың құқықтық негізін құруға көп еңбек сіңіргенін баса айтты.
Өңір тұрғындарының салт-дәстүрлері мен әдет-ғұрыптарын білу, дари, парсы, өзбек, түркімен және тәжік тілдерін меңгеру, оның Ауғанстанның қоғамдық-саяси өміріне белсене араласуына жағдай туғызған. Әсіресе, жергілікті рулық-тайпалық деңгейдегі беделді адамдармен іскерлік қарым-қатынасы оның жұмысына көп септігін тигізген. М.Бақбергенов күнделікті өмірде айналасындағылармен тіл табыса білуімен, ізгілікті ұстанымдарымен, басқа да оң қасиеттерімен ерекшеленген. Қысқасы, оның жоғары адами және іскерлік қасиеттері оған Отанымыз сеніп тапсырған қызметті абыроймен атқаруда айтарлықтай көмектескен. М.Бақбергеновтің Қазақстанның Ирандағы, Ауғанстандағы, Қытайдағы, Тәжікстандағы және Түркіменстандағы елшіліктерінде жасаған жемісті жұмыстары үшін Қазақстан Үкіметі тарапынан жоғары құрметке ие болды. Атап айтқанда, ведомство тарапынан бірнеше рет грамоталармен, медальдармен және орденмен марапатталды.
Мұқан Сәрсенұлы төрт қыз және бір ұл тәрбиелеп өсіріп, олардың барлығын Отанына пайдалы азаматтар ретінде қалыптастырды. Бұл бағытта оның зайыбы Бақыттың қосқан үлесі айтарлықтай болғанын атап кеткен дұрыс. Өйткені, Иран мен Ауғанстандағы күрделі әскери-саяси ахуалға байланысты Мұқан Сәрсенұлының аталмыш мемлекеттерге отбасын алып баруына мүмкіншілігі болмады. Бірге жүрген адамдардың естерінде ол қамқор әке, мемлекеттік дипломатияның жоғары білікті қызметкері, білімді шығыстанушы және сенімді дос ретінде қалмақ.
СІМ баспасөз қызметі.
