Ал Шығыс Қазақстанда тың технологияны қолданысқа енгізу үшін екінші деңгейлі банктермен келісім жасалып, дайындық жұмыстары жүргізіліп жатыр. Блоктардың техникалық реттелген тізбегі түріндегі «Blockchain» жүйесі жеке мәліметтерді үшінші тұлғаларға беру мүмкіндігінен сақтап, ақпараттық қауіпсіздік пен сапалы қызметті қамтамасыз етеді.
«Азаматтарға арналған үкімет» мемлекеттік корпорациясының басқарма төрайымы Әсемгүл Балташеваның айтуынша, «Blockchain» технологиясы кепіл шартын тіркеу үрдісін барынша оңтайландыруға жол ашты.
– Бұған дейін қызмет алушылар мүлік кепіл шартын тіркеу үшін бірнеше мекемені аралауға мәжбүр болатын. Мәселен, жылжымайтын мүлікке құқықтарды тіркеу туралы анықтаманы алу үшін ХҚО-ға немесе egov.kz порталына жүгініп, сосын оны банкке апаратын. Енді банк қызметкері өтінім жасағанда қызмет алушының жылжымайтын мүлікке құқықтары және ауыртпалықтардың бар-жоғы туралы мәліметтер автоматты түрде тексеріледі. Енді адамдар емес, мәліметтер сіз үшін «жүгіретін» болды, – дейді Ә.Балташева.
«Blockchain» технологиясын қолдану арқылы аталған қызметті көрсету мерзімі үш күннен бір күнге дейін қысқарып, банкке ұсынылатын құжаттар тізімі де азайған.
Енді қызмет алушы банктің ақпараттық жүйесінде мүлік шартымен танысып, өзінің ЭЦҚ-сы арқылы қол қояды, ал қызметтің нәтижесі – жылжымайтын мүлікке құқықтарды мемлекеттік тіркеу туралы хабарлама қызмет алушының egov.kz электронды порталындағы жеке кабинетіне жолданады.
«Blockchain» технологиясын таңдау барысында желі қолданушыларының әрекеттерінің айқындығы, орталықсыздандыру және сенімді қорғаныс жүйесі есепке алынды. Елімізде кепіл шартын тіркеу бойынша мемлекеттік қызметті жаңа әдіспен көрсету үрдісі коммерциялық банктің бірімен жүзеге асуда.
«Азаматтарға арналған үкімет» басқа да екінші деңгейлі банктермен осы бағытта қызмет көрсету туралы келіссөздер жүргізіп жатыр. Себебі «Blockchain» технологиясы екі жақты келісім жасасу кезінде үшінші тұлғаларды кірістірмей, қауіпсіздікті қамтамасыз етіп, жылжымайтын мүлік кепілімен берілетін несиені онлайн ресімдеу және несие беру мерзімін қысқартуға мүмкіндік береді.
Шығыс Қазақстан облысы
