Қызмет барысында Ұлттық ұлан жауынгері елордадағы азық-түлік дүкендерінің бірінде төбеден сылақтар түсіп, желдету шахтасынан қою түтіннің шығып тұрғанын байқайды. Жедел әрекет еткен ефрейтор дүкенге келушілер мен сатушыларды далаға шығуын сұрайды. Ол сол мезетте түтіннің екінші қабаттан шығып жатқанын көреді.
Сөйтсе, бұл дүкен сатушысының пәтері екен. Ұландық жауынгер дереу өрт сөндіруші қызметке қоңырау шалады. Оқиға орнына өрт сөндіру қызметі келгенше, үй иесімен бірге пәтерден 3 баланы қауіпсіз жерге алып шығады.
«Дүкенде тұрғанда мен төбеден құлаған заттарды байқап қалдым, ал түтін шыққанда барлығымыз сыртқа шықтық. Дүкен иесі уайымдай бастады. Өйткені түтінденген пәтер оған тиесілі еді. Онда оның балалары болған. Дереу әлгі пәтерге көтеріліп, ішіндегі балалары мен көрші пәтердегі екі баланы сыртқа шығардық. Өрт сөндірушілер келгенше терезелерді ашып, электр құрылғыларын өшірдім», дейді ефрейтор Темірлан Әмірғазин.
