Еліміз үшін ана тіліміздің де, кең-байтақ даламыздың да абыройы асқақ. Президент атап өткендей, «ХХІ ғасыр – білім мен біліктің дəуірі». Ал «шынайы патриоттық сезіммен рухтанып, қасиетті тəуелсіздігімізді одан əрі нығайта түсу үшін бірлесе жұмыс істеу» де маңызды. Осылайша, жастарды еңбекке, білімге үндей отырып, атқарар істің маңыздылығын атап өткен Мемлекет басшысының ел тарихын тереңнен тану мәселесіне тоқталуының мәні тереңде жатыр. Тарихына, салт-дәстүріне қанығып өскен ұрпақтың келешегі кемел. Әжесінің ертегісін естіп өскен, арғымақ мініп шыңдалған әрбір қазақ баласы «батыр» деген атқа әбден лайық. Осы тұста елу жылдан астам тарихы бар бір ғана «Қыз Жібек» фильмінен қазақ халқының тұрмыс-тіршілігі, өнеге-болмысы, батырлығы, қолөнері жайында қаншама құнды мәлімет алуға болатынын айта кеткен абзал. Ал кино қорымыз мұндай мағыналы да мазмұнға бай қаншама құнды жобаларға бай, алдағы күндерде жүзеге асатындары тағы бар.
Бұл ұлтымыздың осынау өнегелі өмірін, тіршілік тәжірибесін ұлттық жобалар арқылы кеңінен дәріптеудің кезі келгенін көрсетеді. Ал ұлттық әдебиетіміздің, мәдениетіміздің одан әрі дамуына жастардың белсенді атсалысуы уақыт сұранысынан туындап отыр. Мемлекет басшысы осы орайда туған еліміздің асыл мұраларын игілігімізге пайдалануға үндей отырып, осы тоқымдай жердің бір уыс топырағынан нәр алған әрбір қазақ баласы жанын аямай еңбек етсе, білім алса деген мағыналы терең ойды қозғай отырып, елдің ертеңіне деген алаңдаушылығын білдіреді. Сондықтан да Қазақстандай әлемге танылған ғажап елдің ұл-қыздарының ертеңі «Бір жағадан бас, бір жеңнен қол шығарған» берекелі болашақпен ғана өрілетіні хақ.
Асанәлі ӘШІМОВ,
Қазақстан және КСРО халық әртісі, Қазақстанның Еңбек Ері
