Әлем • 08 Қаңтар, 2021

Байден билікке келді

46 рет көрсетілді

АҚШ-та наразы топ Конгресс ғимаратын басып алмақ болды. Олардың суреттерін әлеуметтік желі қолданушылары мен онлайн басылымдар жарыса жариялады.

АҚШ-тағы сайлау науқанына қа­тыс­ты дүрбелең басылар емес. Сәрсенбіде Конгрестің бірлескен сес­сиясында Джо Байденнің қараша­дағы президенттік сайлаудағы жеңі­сін заң шығарушылар растауы керек болған. Жиында сайлау кол­ле­гиясының дауыстары есептеліп, күшіне енеді. Дональд Трамп және оның жақтастары сайлау­дың әділ өтпегенін айтып, нәтиже­сімен келіспейтінін біл­дірген. Республи­ка­шылардың Вашинг­тонда сай­лау нәтижесін растауға қарсы нара­зы­лықтар өткізгісі келгені белгілі бол­ған-ды. Осыған орай жүздеген ұлттық гвардия мүшесі тәртіпсіздіктермен күресу үшін сақадай сай тұрған.

АҚШ-тағы сайлау көпті жаңыл­дыруы мүмкін. Өйткені Прези­дент пен Кон­гресс сайлауы был­тырғы қарашада өтіп кеткен еді. Демо­краттар өкілдер пала­тасын бақы­лауға алды, ал Джо Бай­ден президент болды. Алайда АҚШ Конгре­сінің жоғарғы палатасының тағды­ры толық шешілмеді. Себебі Джорд­жия штатындағы екі Сенат сай­лауы­ның нәтижесі белгісіз болды. Штат ережесіне сәйкес, жеңімпаз канди­датқа 50%-дан астам дауыс қажет, ал қара­шада оған ешкім қол жет­кізе алмады. Жалпы, сайлау нәти­жесі белгілі болмай тұрып, респуб­ли­калықтарда 50, ал демократ­тарда 48 орын болды. Егер екі демо­крат жеңіске жетсе, Сенат 50 де 50 болып тең бөлінеді, бұл жағ­дайда шешуші дауыс вице-президент Камала Харриске беріледі. Нәтиже тура осы сценарийге сай өрбіді. Осылайша, Сенаттың қос палатасы мен президенттік сайлауда жеңген демократтардың биылғы саяси науқанда асығы алшысынан түскен секілді.

Дәл осы жағдай республи­ка­шы­лардың наразылығын тудырған болуы керек. Сайлауда жеңілгеннен кейін Трамп та сайлаудың әділ болма­ғанын айтып, дауыстардың дұрыс есептелгеніне күмән келтірумен болды. Бұл пікірді қолдайтын Трамп жақтастары Капитолийдегі жиында Джо Байденді президент деп жарияламау үшін барын салды. Сейсенбінің кешінде бірді-екілі ашулы азаматтар Ақ үйдің сыртында қарулы жүрген жерінен ұсталған. Трамп Вашингтонда наразылыққа шыққан мыңдаған халықтың алдына сөз сөйлеп, «Конгресс жиынында вице-президент Майк Пенс сайлау коллегиясының дауыс нәтижесін жоққа шығарса жеңіске жетеміз» деумен болды.

Ал Трамптың ашулы жақтастары жиын өтіп жатқан Капитолий ғимаратын басып алуға әрекет жасады. Нәтижесінде, Конгрестің қос палатасы отырысты тоқтатып, жан сауғалауға мәжбүр болды. Ғимаратты басып алғандардың суреттерін әлеуметтік желі қолданушылары мен онлайн басылымдар жарыса жариялады. Заң шығарушылар жұмысын Ва­шингтонда коменданттық сағат енгізген соң жалғастырып, Джо Байденді АҚШ-тың келесі прези­денті, ал Камала Харристі вице-президент деп таныды. Капитолийдегі жағдайдан 4 адам қаза тауып, 52 адам ұсталды.

Жалпы, АҚШ конституциясына сәйкес дауыс беру нәтижесін Кон­гресс мақұлдауы шарт. Бұл әрекет арқылы сайлаушылар алқасының дауыс нәтижесі заңды негізде расталады.

Соңғы жаңалықтар

Сочиде сайысқа түседі

Спорт • Бүгін, 13:28

Маңызды қадам болды

Парламент • Кеше

Ұқсас жаңалықтар