Алматыда өткен жылы 23 897 адам тұрақты жұмыс тапты

Аймақтар • 08 Қаңтар, 2021

Алматыда өткен жылы 23 897 адам тұрақты жұмыс тапты

19 рет көрсетілді

Бүгін Алматы қаласының Өңірлік коммуникациялар қызметінің алаңында өткен онлайн-брифинг барысында Алматы қаласы Әлеуметтік әл-ауқат басқармасы басшысының орынбасары Данияр Әлкебайұлы халықты жұмыспен қамту бойынша қабылданған шаралар туралы баяндады, деп хабарлайды Egemen.kz

Айнаш ЕСАЛЫ

Д. Әлкебайұлы атап өткендей, 2020 жылы жұмыссыз азаматтарды жұмыспен қамтуға ықпал ету және белсенді шараларға бағыттаудағы «Еңбек» мемлекеттік бағдарламасы үш бағытта жүргізілді.

Бірінші бағыт аясында кәсіби оқулар, оның ішінде қысқа мерзімді курстар ұсынылды.

Мысалы, 2020 жылы осындай курстарда 27 кәсіп (мамандық) бойынша 25 оқу орталықтарында 1 005 адам білімдерін жетілдірді. 932 адам оқуды аяқтады, оның ішінде 624 адам немесе 67%-ы жұмысқа орналастырылды. Осы шараларға 226,9 млн.теңге бөлінді.

Екінші бағыт бойынша дағдарысқа қарсы шаралар аясында 947,3 млн теңге бөлінді, жеке бизнестерін немесе бұрынғы кәсіптерін алға жылжыту үшін 555 мың теңгеден 1705 тегін гранттар берілді. Грант алғандардың айналысатын негізгі жұмыстары тігін ісі, тамақ дайындау, маникюр және шаштараз және тағы басқасы бар.

Үшінші бағыт аясында қоғамдық жұмыстардың жоспары 3 мыңнан 14 мыңға дейін ұлғайтылды. Жұмыспен қамтудың осы түріне 16 мың жұмыссыз адам қатысты, бұл шараға 5,8 млрд теңге бөлінді. Басқа уақытша жұмыс орындарына 2,7 мың адам жіберілді, оның ішінде жастар практикасымен ЖОО мен колледждердің 1,5 мың түлегі қамтылды.

23 897 адам тұрақты жұмыспен қамтылды. Оның ішінде мемлекеттік бағдарламалар аясында – 735 адам, «Еңбек» порталы арқылы – 11 403 адам. Мемлекеттік қолдау шараларынсыз 11 759 адам жұмыспен қамтылды.

Мемлекеттік және үкіметтік бағдарламалар аясында 76 301 жаңа жұмыс орны құрылды (оның ішінде 35 032 тұрақты жұмыс орны), оның ішінде: кәсіпкерлік субъектілері – 30 032, «Еңбек» мемлекеттік бағдарламалары бойынша – 18 648, аймақтарды дамыту бойынша – 824, «БЖК 2020» бойынша – 3 540, ЖҚЖК бойынша – 21 863, «Нұрлы жер» бағдарламасы бойынша – 455, білім мен ғылымды дамыту бойынша – 70, ҒБДМБ бойынша 869 адам жұмыспен қамтылды.

Дағдарысқа қарсы шаралар аясында «Жұмыспен қамтудың жол картасы» іске асырылуда. 228 жоба бойынша 21,8 мыңға жуық жұмыс орны құрылды, Жұмыспен қамту орталығы арқылы 11 мыңға жуық жұмыссыз жұмыспен қамтылды, жұмыспен қамтылған жастардың үлесі 37%-ды құрайды.

Күннің маңызды және өзекті жаңалықтарын «Егемен Қазақстан» телеграм каналынан оқыңыз