Аймақтар • 12 Қаңтар, 2021

Қараусыз қалған мал ұрланады

22 рет көрсетілді

Өткен жылдың бірінші жартыжылдығында өңірде 148 сиыр, 216 жылқы, 497 қой және 4 түйе ұрланған. Соның ішінде ауыл­дық жерлерде алыс жайылымдардағы қараусыз жүрген сиыр, жылқылардың көбі­рек ұрлануына көбінесе мал бағуға жауапты мал­шылардың өз жұмыстарына салғырт қарауы себепші. Соңғы жылдары мал ұрлы­ғ­ы да ұйымдасқан сипат ала бастады.

Бұрынғы уақытта ұрылар да алыстан кел­мей­тін болса, соңғы жылдары қай жақтың ұрысы келіп, алып кеткенін жұрт біле алмай дал. Өйткені, бұл қылмысқа әбден машықтанған қаскүнемдер малды бірден сойып, етін сатып жіберетіндіктен, қылмысты дәлелдеу оңайға соқпайды. Осылайша қылмыстың бір шеті мал базарларындағы ет сатушыларға да келіп тіреледі. Мал ұрлығына қатысты заң талаптары қатаңдатылғанына қарамастан, қылмыс күз бен қыс кезінде тіпті күшейе түседі.

Полицейлер «қылмыспен күресудің ең тиімді тәсілі – оның алдын алу», дейді. Ауыл адамдары бейқам отырмай, мал бағу жұмыстарын өздері ұйымдастырып, ауыл әкімдері мен учаскелік полицейлер тұрғындар арасында түсіндіру жұмыстарын жүргізуі керек. Өйткені, осы кезге дейін ұрланған малдың негізгі бөлігін жайылымда қараусыз жүрген жеке адамдардың малы құрайды. Соның ішінде күзгі уақытта күзетті күшейтіп, шаруашылықтар мал қораларына дабыл қондырғылары мен жарық орнатуы қылмыстың алдын алудың ең төте жолы.

Ақтөбе облыстық ПД бастығы Атығай Арыстановтың айтуынша, енді мал ұрлығы үшін ҚК 188-1 бабы бойынша, 3000 АЕК дейін (8 334 000 теңгеге дейін) айыппұл салынады немесе 5 жылға дейін бас бостандығынан айыру жазасы қарастырылған. Жеке тұрғын үй-жай немесе шаруашылықтың, кәсіпорынның қорасынан мал ұрлағандарға 5 жылдан 10 жылға дейін бас бостандығынан айыру жазасы кесіледі. Сондай-ақ ұйымдасқан түрде қылмыс жасағандардың бірнеше малды ұрлағандары дәлелденсе, қолға түскендер 7 жылдан 12 жылға дейін бас бостандығынан айыру жазасына кесіледі. Тәртіп сақшылары мал бағу жұмысы жақсы ұйымдастырылып, жануарларға ен-таңба жапсырмалары салынып, GPS трекерлері пайдаланылған, қысқасы мал ұрлығын алдын алу шаралары қабылданған аудандарда жаз бен күзде қылмыс тіркелмегенін хабарлады. Ал алыс ауылдарда жайылымдағы мал бұрынғысынша қараусыз жүреді. Сондықтан полицейлер, әсіресе күз-қыс айларында тебіндегі жылқыларына абай болуға шақырады.

 

Ақтөбе облысы

 

Соңғы жаңалықтар

Ұқсас жаңалықтар