Елімізде 1 млн-нан аса оқушы дәстүрлі форматта оқиды

Брифингте бірінші болып сөз алған Білім және ғылым вице-министрі Шолпан Каринова 11 қаңтардан бас­­талып, 20 наурызға дейін жалғасатын негізгі оқу тоқсанында санитарлық ахуалға қарай оқу процесі әртүрлі форматта жүргізілетінін жеткізді.

– Сабақтардың 70 пайызы штаттық режімде, қалғандары қашықтан өтеді. Бірақ мұнда ескеретін бір жайт бар. Қандай пәндерді штаттық режімде, қайсысын қашықтан оқытатынын әрбір білім беру ұйымы қажеттілігіне қа­рай өздері дербес анықтайды. Бұдан бөлек интернаттарда, арнайы мектеп-интернаттарда, жалпы үлгі­де­гі мектеп-интернаттарда, мектеп жанындағы интернаттарда және дарынды балаларға арналған мектеп-интернаттарда оқуға және тұ­руға рұқ­сат етіледі. Барлық жағдайда штат­­­тық оқыту бойынша шешім тиіс­ті аумақтың бас мемлекеттік сани­тарлық дәрігерлерімен бірлесіп қабылданады. Қазақстандық мектептерде 3,4 млн бала оқиды, оның 41,7 пайызы дәстүрлі форматта білім алады. Әкімдіктердің мәліметінше, 1-5 сынып оқушыларының 24 пайызы кезекші сыныптарда, 10,3 пайызы шағын жинақталған мектептерде, 260 мың 9-11 сынып оқушылары штаттық режімде оқуын жалғастырады, – деді Ш.Каринова.

Карантин кезіндегі қашықтан оқы­ту барысында ата-аналар мен қоғам белсен­ділері бітіруші сыныптар­ды қа­шықтан оқыту түлектердің бола­шағына жасалған қиянатпен тең екенін айтып, дабыл қаққан еді. Осы ой ескерілді ме екен, ми­нистр­лік өкілі меншік нысанына қара­мастан еліміздегі барлық білім беру ұйым­да­рында бітіруші сынып оқу­шы­ла­рының негізгі пәндерді дәс­түр­лі форматта оқитынын мәлім­деді.

– Пәндердің 70 пайызы дәстүрлі фор­матта, ал 30 пайызы қашықтан оқы­­ты­лады. Биыл еліміз бойынша бі­тіру­­ші сыныптардағы оқушы­лар­дың саны 440 мыңнан асады. Оқу процесін аралас форматта ұйымдастыру кезінде санитарлық-эпидемиялық нормалар сақталып, сабақтардың ыңғайлы кестесі құрылады. Сондай-ақ әлеуметтік арақашықтықты сақ­тау үшін ауысымдар мен кіші ауы­сым­дар саны ұлғайтылып, әрбір сынып үшін сабақ арасындағы үзі­ліс­тер әр­түрлі уақытта болады. Са­ни­тарлық талап­тарға сәйкес мектепке кіру ке­зінде білім алушылар мен педа­гог­­тердің дене қызуын күнде­лік­ті өлшеу қажет. Қажет болған жағ­дай­да педагогтердің, оқушы­лар­дың және ата-аналардың қалауы бойынша штаттық форматта білім алып жатқан оқушылар үшін мектепте жеке консультациялар өткізуге рұқ­сат беріледі. Бірақ бір топта 5 адам­нан артық болмауы тиіс, – деді вице-министр.

97 колледж офлайн білім береді

Елімізде 796 колледж жұмыс іс­тей­ді. Жалпы колледждерде жаңа семестр 18 қаңтарда басталады. Екінші семестрден бастап қазақстандық кол­ледждерде оқу процесі дәстүрлі, қашықтан және аралас форматта жалғасады.

– Колледждердің бірінші курс сту­денттері оқуын штаттық режімде оқи­ды. Олардың саны бүгінде 149 мыңнан асады. Ауылдық жерлер мен шағын қалаларда орналасқан 97 колледж, сондай-ақ Ішкі істер минис­трлігінің және Қорғаныс ми­нис­трлігінің жанындағы, бұған қоса тағы 14 жабық колледж өз студент­тері үшін оқуды дәстүрлі фор­мат­­та ұйымдастырады. Қазіргі таңда жергілікті атқарушы орган­дар мен білім беру ұйымдары мекемелерді да­йындайды және оқыту үшін қо­лай­лы санитарлық жағдай жасайды. Мұнда да 70/30 қағидаты қол­да­нылады, сондай-ақ форматты және пәндерді ұйымдардың өздері таңдайды. Сонымен қатар қаладан тыс жерлерден келген студенттер үшін жатақханаларда барлық жағдай жасалады, – деді Ш.Каринова.

Вице-министрдің мәлімдеуінше, оқу үдерісін ұйымдастыру бойынша әдістемелік ұсынымдар әзірленіп, барлық білім беру ұйымына жет­кі­зіл­­ді. Сондықтан дайындық толық жүргізілген. Аудиториядағы сабақ­тар­дың ұзақтығы 45 минуттан аспайды, колледж әкімшілігі соған лайықты кесте құрады. Аудиторияларды сани­тар­лық тазарту сабақтар арасын­дағы үзілістер кезінде және одан кейін де жүзеге асырылады.

ЖОО дәстүрлі форматқа біртіндеп көшеді

Білім және ғылым министрінің жоғары білім беру бойынша орынбасары Мирас Дәуленов аталған брифингте отандық жоғары оқу орын­да­рының алдағы семестрде біртіндеп дәстүрлі форматта оқытуға көшетінін айтты.

– Елімізде 128 жоғары оқу орны жұмыс істейді, онда 600 мыңнан аса студент білім алады. 18 қаңтар мен 15 ақпан аралығында ЖОО-да көктемгі семестр басталады. Дәстүрлі оқытуға біртіндеп көшу мәселесі пысықталып жатыр. Ел аумағында коронавирус инфек­циясының пайда болуы мен тара­луына жол бермеу жөніндегі ведомствоаралық комиссияның шешімі бойынша 1-курс студенттері, яғни 150 мың адам үшін оқу процесі аралас форматта ұйымдастырылады. Демек, дәріс­тер онлайн режімде, семинарлар, қолданбалы сипаттағы зертханалық және практикалық сабақтар күндізгі форматта өтеді. 2-ші және 3-курстарда оқыту күзгі семестрдегідей да­йындық бағыттарына байланыс­ты қашықтан немесе аралас фор­мат­тарда жүргізіледі. Педа­го­ги­ка­­лық, гуманитарлық, әлеуметтік ғы­­лымдар, журналистика, бизнес, басқару және құқық, т.б. ба­ғыт­­тар бойынша қашықтан оқыту ұсы­ны­лады. Ал өнер, жаратылыстану ғылымдары, инженерлік салалар, ауыл шаруашылығы, денсаулық сақтау және т. б. бағыттар бойын­ша студенттер аралас форматта бі­лім алады. ЖОО студенттерді осы форматта қабылдауға дайын. Қазір­гі уақытта тиісті санитарлық-эпиде­миялық талаптарды сақтауға қа­жетті жағдайлар жасалған, – деді М.Дәуленов.

Министрлік өкілінің айтуынша, басқа қалалардан келген студенттерге жатақханалардан орын беріледі, бірақ бөлмелерде адам саны 50 пайыздан аспауы тиіс. Ал жоғары білімнен кейінгі оқыту жағдайында теориялық дәрістер (қажет болса), ғылыми-зерттеу жұмыстарын орындау, магистранттар мен докторанттарды қорытынды аттестаттау жоғары оқу орнының ака­де­миялық саясаты мен күнтізбесіне сәйкес қашықтан және аралас форматта жалғасады.