Коронавирус • 14 Қаңтар, 2021

Қазақстан орташа қауіпті «сары аймаққа» ауысты

4 рет көрсетілді

Әлемді әлекке салған арыны қатты індеттің беті қайтар түрі жоқ. Англияда анықталған коронавирустың жаңа штаммы басқа да елдерден табылып, жаһан жұртын әжептәуір алаңдатып қойды. Вирустың бұл түрі біздің елде кездеспегенімен, жалпы Қазақстандағы эпидемиялық жағдай нашарлаған. Қазір еліміз тәуекелі тө мен «жасыл аймақтан» орташа қауіпті «сары аймаққа» ауысты.

Орталық коммуникация­лар қызметі алаңында Ден­саулық сақтау вице-министрі, Мемлекеттік бас санитарлық дәрігер Ерлан Қиясов елдегі эпидемиялық ахуал жөнінде баяндап, соңғы мәліметтерден хабардар етті. Оның айтуын­ша, 13 қаңтардағы жағдай бойынша КВИ-мен ауырған 164 477 науқас және КВИ теріс нәтижелі 46 499 науқас тір­келді. Науқастардың 87%-ы сауығып шықты. Бүгінде ау­руханаларда – 5 732 науқас, ал реанимацияда 357 науқас жатыр.

«Қазір тәуекелі орташа аймақта немесе «сары ай­мақта» Алматы, Нұр-Сұл­тан қалалары, Солтүстік Қазақ­стан, Павлодар, Атырау облыс­тары тұр. Сондай-ақ соң­ғы айда Батыс Қазақстан облы­сы «жасыл аймақтан» «сары аймаққа» көшірілді. Қал­ған өңірлер – «жасыл аймақ­та». Атырау облысында сыр­қаттанғандардың саны ай­тарлықтай өскені байқалады, дәлірек айтқанда, 3,7 есеге артқан. Бұл көрсеткіш бо­йынша Алматы облысында 1,8 есеге, Қарағанды облысында және Алматы қаласында 1,5 есеге, Маңғыстау облысында 81-ден 315 жағдайға дейін, Түркістан облысында 102-ден 256 жағдайға дейін, Шымкент қаласында 150-ден 195 жағдайға дейін, Қы­зыл­орда облысында 48-ден 135 жағдайға дейін ауру жұқ­тырудың өскені байқалады», деді Е.Қиясов.

Мемлекеттік бас сани­тар­лық дәрігердің қалыптасқан эпидемиялық жағдайды ес­кере отырып, карантиндік ша­раларды күшейту бойын­ша шаралар қабылдау қарас­тырылып жатқанын мәлім­деді. Сонымен қатар ауруды сырттан әкелу жағдайы азаяр емес. 13 қаңтардағы жағдай бо­йынша мемлекеттік шекарада 859 адамнан КВИ анық­талды. Зертханалардың қуа­ты тәулігіне 100 мыңға жуық зерттеу жүргізуге дейін артты.

«Қыркүйек айында Ан­глияның оңтүстік-шығы­сында генетикалық жолдағы көптеген өзгерістерден тұра­тын вирустық геном­дық жүйе­леу арқылы корона­вирустың жаңа штаммының алғашқы жағдайы анықталды. Бүгінгі таңда вирустың бұл түрі бірнеше елде соның ішінде Аустралия, Дания, Италия, Ис­ландия, Нидерланды, Ресей және басқа елдерде анықталған. Алдын ала мәлі­меттер бойынша жаңа штамм вирустың басқа нұсқаларына қарағанда, жас популяциялар арасында белсенді таралады. Бірақ бұл құбылысты зерттеу әлі де жалғасуда. Қазақстанда вирустың бұл түрі анықталған жоқ. Вирустың ауа арқылы берілу механизмін ескере отырып, оны елімізге әкелу қаупін жоққа шығаруға болмайды», деді вице-министр.

Бұдан кейін тиісті ведомство өкілі мектептердегі офлайн оқудың жалғасуына байланысты журналистердің сауалына жауап берді. Соның ішінде мектеп асханаларының жұмысына тоқталды. Асха­на­ларды қолайлы эпидемиялық аймақтарда орналасқан жекелеген аймақтарда ашу жоспарланып жатыр екен. Сондай-ақ балалардың қауіпсіздігін қамтамасыз ету және коронавирус инфекциясын жұқтыру қаупін азайту үшін асханаларды ашу алгоритмі егжей-тегжейлі сипатталады.

Сонымен қатар брифингте Медициналық және фармацевтикалық бақылау комитеті төрағасының орынбасары Нұрлыбек Асылбеков вакциналауға дайындық барысы туралы айтып берді. Оның айтуынша, жұмыс тобы шприцтерді дайындау, логистика, тасымалдау және сақтау мәселелерін пысықтауда. Қазір «СК-Фармация» вакциналарды көптеп орналастыруға болатын 4 хаб дайындады. Вакциналарды жүргізу, сақтау және тасымалдау бойынша әдістемелік ұсынымдар әзірленуде. Жоспарланған көлем бойынша шприцтер қоры дайындалды.

Соңғы жаңалықтар

Ұқсас жаңалықтар