Саясат • 15 Қаңтар, 2021

Төрт жылда 54 парақор ұсталған

26 рет көрсетілді

Ақтөбе облысы бойынша Сыбайлас жемқорлыққа қарсы күрес департаменті соңғы 4 жыл ішінде парақорлыққа қатысы бар деген күдікпен 54 азаматты жауапкершілікке тартқан. Бұлардың ішінде 23 азамат бас бостандығынан айыру жазасына кесілсе, парақорлықпен ұсталған 31 адамға 200 млн теңге айыппұл төлеу жазасы қарастырылған. Бұл туралы Ақтөбе облысы бойынша Сыбайлас жемқорлыққа қарсы күрес департаментінің басшысы Бауыржан Балғабеков хабарлады.

 

Төрт жылда құқық қорғау органдарының 32 қызметкері пара алған кезде ұсталған. Өткен жылы ІІМ қарасты Батыс өңірлік әскери-тергеу басқармасының Ақтөбе облысы бойынша басқарма басшысының 49 млн теңге пара алып жатқан жерінде қолға түсуі үлкен резонанс тудырған еді. Дәл осындай қылмысқа барды деген күдікпен ұсталған осы басқарманың тергеушісі 2,3 млн теңге айыппұл төлеп, абақтыда отырудан құтылды. Сыбайлас жемқорлыққа барғаны үшін істі болғандардың қатарында 18 мемлекеттік органның, 7 квазимемлекеттік сектордың басшысы бар. Ақтөбе облысы бойынша ішкі мемлекеттік аудит департаменті басшысының орынбасары пара алғаны үшін 4 жылға бас бостандығынан айырылды. «ҚТЖ» ҰК қарасты Ақтөбе магистральды желі бөлімшесінің Шалқар жол дистанциясының бастығы пара алып жатқан жерінде ұсталып, сот оған 36 млн теңге көлемінде айыппұл салу жазасын тағайындады.

Елімізде лауазымды тұлға­лар­ды пара алуға итермелеп, делдалдықпен айналыса­тын, заңсыз сыйақы беруші тұлға­лар­дың жауапкершілігі де кү­шей­тілді. Өңірлік көліктік ба­қылау инспекциясының бас маманы «Самара-Шымкент» тасжолының бойында рұқсат етілген салмақтан асып кеткені үшін жүк көлігінің жүргізушісіне айыппұл толтырғанда, жүргізуші инспекторға 20 мың теңге пара ұсынған. Артық қарбыз тиегені үшін 20 мың теңгемен құтылмақ болған транзиттік көлік жүргізушісі ақыры мемлекетке 200 мың теңге айыппұл төледі. Карантиндік талаптарды бұзғаны үшін әкімшілік жауапкершіліктен қашып, айыппұл төлегісі келмеген жергілікті тұрғын полиция қызметкерінің банктік карточкасына 10 мың теңге аударып жіберген кезде, пара ұсынғаны үшін әкімшілік жауапкершілікке тартылып, соттың шешімімен 100 мың теңге айыппұл төледі.

2020 жылдың желтоқсан айының соңында Мемлекет басшысы сыбайлас жемқорлыққа қарсы іс-қимыл саласындағы бірқатар заңнамалық өзгеріске қол қойды. Заңдағы соңғы өзгерістер бойынша па­ра­­­қорлыққа қатысты заң та­лап­­тары күшейіп, пара алушылар мен пара берушілерге жаза мерзімі ұзартылды. Егер бұрын Қылмыстық кодекстің 367-бабының 2-бөлігінде «айтар­лық­тай мөлшерде пара беру» қылмысы үшін ең жоғарғы жаза – 5 жылға дейін бас бостандығынан айыру қарастырылып, бұл орташа ауыр қылмыс санатына жатқызылған болатын. Биылдан бастап осы бап бойынша айып­талғандар ауыр қылмыс жасаған санатқа енгізіліп, сот оларға 7 жылға дейін бас бос­тан­дығынан айыру жазасын тағайындайтын болды. Сондай-ақ биылдан бастап пара алғаны немесе бергені үшін сотталғандар шартты түрде мерзімінен бұрын босап шыға алмайды әрі олар жаза мерзімін қауіпсіздігі төмен қоныс-ко­лонияда өтей алмайды. Пара бергені және парақорлыққа делдал болғандарға айыппұл мөлшері де бірнеше есе өсті. Биылғы жылдан бастап пара бергені үшін сотталғандар айыппұлдың 20 еселенген сомасын төлейді. Егер 100 мың теңге пара ұсынғаны үшін сотталған азамат мемлекетке 2 млн теңге айыппұл төлейді. Бұған дейін ең төменгі айыппұл көлемі 1 млн теңгені құраған еді. Кәсіпкерлердің жұмысына кедергі келтірген құқық қорғау органдарының қызметкерлеріне де жауапкершілік қатаңдады. Қылмыстары дәлелденсе, құ­қық қорғау органдарының қыз­меткерлері 5 жылға дейін бас бостандығынан айырылады. Осы бап бойынша бұрынғы заңнамада 2 жылға дейін ғана бас бостандығынан айыру жазасы бекітілген болатын. Ал кә­сіп­кер­лердің жолына кесе көл­де­нең тұрған құқық қорғау органдары басшылары немесе судьялар 8 жылға дейін бас бостандығынан айырылады.

Қылмыстық кодексте сыбай­лас жемқорлыққа қарсы заң талаптары күшейтілгенімен, қоғамның дамуын артқа тартатын жемқорлық атты жағымсыз құбылысты тоқтатуға мүмкін бола ма, жоқ па, мұны алдағы уақыт көрсетеді.

 

АҚТӨБЕ

 

Соңғы жаңалықтар

Шерхан Мұртазаның үйі

Әдебиет • Кеше

«Жасыл» аймақта екі өңір

Коронавирус • Кеше

Бүгін - Аналар күні

Қазақстан • Кеше

Әлемде эпидахуал қандай?

Әлем • 18 Қыркүйек, 2021

Токио марафоны 2022 жылға шегерілді

Спорт • 18 Қыркүйек, 2021

Алматыда тау бөктері өртеніп жатыр

Аймақтар • 18 Қыркүйек, 2021

Ұқсас жаңалықтар