Оқиға • 18 Қаңтар, 2021

Генерал киген китель

320 рет көрсетілді

Кеңес Одағының Батыры атағын үш дүркін иелен­ген даңқты ұшқыш А.И.Покрыш­кин «соғыс адам санын азайтады, есесіне батырларды көбейтеді» деген екен. Осы кісі айтқандай, 1941-1945 жылдары ғаламды дүрліктірген алапат соғыс қазақ ұлтына үш генерал сыйлады.

Біріншісі – өзбек ағайындар ортасында өсіп-өнген қандасымыз Сабыр Рахимов 1943 жылы 19 наурызда әске­ри жоғары шен генерал-майор ата­ғына қол жеткізсе, екінші қазақ – Шәкір Жек­сенбаев 1943 жылы қазан айын­да, үшінші қазақ – Моңғолия әуе күш­терінің бас қолбасшысы Жайсанып Мүдәрісұлы 1944 жылдың сәуір айында бұл атаққа ие болыпты.

Осылардың ішінде Батыс Қазақстан облысы, Орда ауданы Шоңай ауылында 1901 жы­лы дүниеге келген Шәкір Жек­сен­бай­ұлы­ның туғанына биыл 120 жыл толып отыр.

Жуықта Орал қаласына барған сапарымызда облыстық тарихи-өлкетану музейінің көрме залында тұрған гене­ралдың кителін көрдік. Жібек матадан тігілген әскери мундирдің иығында ге­нерал-майор погоны және қайырма жа­­ғасында алтын-бидай пошымды айыры­м таңбасы тұр. Сол жақ омыра­уын­­­­­­да «Ленин» орденімен қатар 4 мәрте ие болған «Жауынгерлік Қызыл Ту» ордені және «Отан соғысы», «Қы­зыл Ту» ордендерінің лентасы көз тар­тады.

Музей директорының орынбасары Ажар Берікқалиева ханымның айтуы бойынша, бұл жәдігерді генерал 1977 жылы 19 желтоқсан күні осы музейге өз қолымен әкеліп тапсырған екен. Өйткені бұл жылы КСРО-ның құрылғанына 60 жыл толып, даталы той Одақ көлемінде кеңінен атап өтіліпті. Аталмыш мереке қарсаңында Мәскеу қаласында тұратын генерал атамыз жұбайы Нина Ивановнамен бірге Орда аудандық партия комитетінің бірінші хат­шысы, соғыс ардагері әрі ақын Рах­ме­толла Егізбаевтың шақыруымен туған жеріне келген. Дәл осы сапарын­да жоғарыдағы жәдігерді музейге тап­сырған сияқты.

Бұл оқиғаның басы-қасында жүр­ген, қазіргі таңда Орал қаласында тұратын Жексенбаевтың немере інісі, техника ғылымдарының докторы Ермек Ай­талиев, «генералға ауылдас­тары астына ат мінгізіп құрмет көрсетті, сонымен қатар аудан орталығында халықпен кездесу ұйымдастырды» дейді. Осындағы тарихи сәттен естелік ретінде түсірілген фотолар Ермек Сәтпайұлының жеке қорында сақтаулы екен.

Соңғы жаңалықтар

Ұқсас жаңалықтар