Бизнес • 25 Қаңтар, 2021

Кәсіпкерге кедергі де, көмек те бар

27 рет көрсетілді

Мемлекет кәсіпкерлер құқығын қорғау бағытында түрлі шара қолданып, заң талабын мейлінше жеңілдетуге ұмтылып отыр. Есесіне, іскер азаматтардың қолындағы өндіріс өркендеп, жұмыс орны көбейіп, шағын және орта бизнес тарапынан экономикаға қосылған үлес те артып келеді.

Дегенмен қоғамда жеке кәсіп­кердің жолын кесетін, ел ішіндегі іскер­ліктің ілгерлеуіне ке­дер­гі кел­тіру­шілер де кемімей тұр. Атап айт­қанда, кәсіпкерлердің мүд­де­сін қор­­ғайтын ұйымдар биз­нес­тің дамуы­на барынша қарсы болатын кертартпа көзқарастағы кісілердің һәм топтың барын жоққа шығармайды екен. Мұндай әрекеттердің артында жең ұшынан жалғасқан жемқорлық пен жеке мүддені көздеушілердің тұрғаны да жасырын емес. Мысалы, өткен жылы Алматы облысында кә­сіпкерлердің құқығын аяққа тап­тау­дың кесірінен бизнес 1,2 млрд теңге зиян шеккен.

– Аймақтағы бизнестің түйткілді мәселелерінің қатарында мемлекеттік сатып алу мен жер қатынастары саласы, мемлекеттік органдардың іс-әрекеттеріне шағымдар, салық, агро­өнер­кәсіптік кешен саласындағы ке­леңсіз әрекеттерді атауға болады. Өткен жылы біздің палатаға кәсіпкерлердің құқығын қорғау бо­йынша заңды тұлғалардан 233 өті­ніш келіп түсті, оның 88-і оң шеші­мін тапты. Былтыр біздің қол­дауымыздың арқасында бизнес құқығы жалпы сомасы 1,2 млрд тең­геге қорғалды, бұл 2019 жылмен салыс­тырғанда екі есе көп, – дейді облыс­тық Кәсіпкерлер палатасының басшысы Әсет Шаяхметов.

Даулы мәселелерді шешуге палата өкілдері үшінші тарап ретінде қол ұшын созып отыр екен. Мәселен, былтыр заңгерлер сотта «АЛСАД Қазақстан» ЖШС құқығын қорғап, сотқа жүгінген. Компания соттан мемлекеттік органның әрекетін заңсыз деп тануды және 2020 жылғы наурыздан мамырға дейін тағамдық тауық жұмыртқасы өндірісінің құнын арзандатуға өтінімдер қабылдау және субсидиялар төлеу бо­йынша бұзылған құқықтарын қалпына келтіруді талап еткен. Істі қараған сот кәсіпорынның 56 млн теңге көлеміндегі талап-ары­зын қанағаттандыру туралы ше­шім шығарыпты. Сондай-ақ палата са­рап­шыларының қатысумен 243 нормативтік-құқықтық актілер қара­лып, тиісті шешімін тауыпты.

Жалпы, өткен жылы Алматы облысында 16 мыңнан астам кәсіпкер сервистік қызмет пен кеңес алған екен. Оның ішінде бизнесті қаржысыз қолдау бағытындағы жұмыс қарқынды жүргізіліпті.

– Біз былтыр өңірдің 16 мыңнан астам кәсіпкеріне 17,5 мың сервистік және консультациялық қызмет көр­сет­тік. Кәсіпкерлер, негізінен, жеке кәсіпкерлік ашу, бизнес-жоспарды әзірлеу, бухгалтерлік есепті тапсыру сияқты қызметтерге көп жүгінді. Біздің палатаның араласуымен 1,3 мың жоба мемлекеттік қолдау құралдары аясында қаржыландырылды. Сондай-ақ менеджерлеріміз жалпы сомасы 50 млрд теңгеге жуықтайтын 529 бизнес-жоспар әзірледі. Оның ішінде 5,2 млрд теңгенің 153 жобасы іске асты, – дейді Әсет Шаяхметов.

 

Алматы облысы

 

Соңғы жаңалықтар

Ұқсас жаңалықтар