Елорда • 26 Қаңтар, 2021

Елорда әкімі тұрғындардың газдың бағасына келіспеушілігі болғанын мойындады

437 рет
көрсетілді
2 мин
оқу үшін

Бүгін Үкіметтің кеңейтілген отырысында Президент Қасым-Жомарт Тоқаев елорда әкімі Алтай Көлгіновке бірқатар мәселені кезек күттірмей, жедел шешу керектігін айтып өтті, деп хабарлайды Egemen.kz

Елорда әкімі тұрғындардың газдың бағасына келіспеушілігі болғанын мойындады

Мемлекет басшысы ең алдымен бас шаһарды газдандыру мәселесі қалай жүргізіліп жатқанын сұрады.

«Елорданы дамытудағы жалпы амал-әдістердің бағыт-бағдары дұрыс деп есептеймін. Әлбетте, құрылыс жұмыстарына баса мән берген абзал. Үй құрылысы болсын, мектептер мен азаматтарға қатысты инфрақұрылым жайлы да айтарым сол. Себебі елорда өз еліміздегі халыққа да, сырттан келетін азаматтарға да тартымды қала болуы керек. Инвестициялардың маңызы зор, сол себепті бұл мәселеге баса назар аударып отырғандарыңыз дұрыс. Мен инженерлік инфрақұрылымды салу жағынан Үкімет пен қала әкімдігінің жұмысын қолдаймын. Біз бұған дейін елорданың өзін сала бердік те, астындағы инфрақұрылымын ұмыт қалдырғанбыз. Ал инженерлік, коммуналдық инфрақұрылымсыз қала күндердің күні «тұншығып», бір күні үлкен мәселемен бетпе-бет келуіміз мүмкін», деді Мемлекет басшысы.

Қасым-Жомарт Тоқаев сонымен қатар қаланы газдандыру мәселесіне жеке тоқталды.

«Елорданы газдандыру жұмысын Елбасы Нұрсұлтан Әбішұлы Назарбаевтың өзі тікелей тапсырған еді. Қазір бірақ азаматтардың үйлерін газға қосу қарқынын сақтау керек. Жеке үйлердің газға қосылуы жағынан мәселесі барын естіп жатырмыз. Себебі олар үшін газға қосылу бағасы жылына 500-700 мың теңгеге дейін барады екен. Бұл өте қымбат сома секілді. Бұл мәселені қалай шешесіздер?», деп сұрады Президент.

Бұл сұраққа жауап берген Нұр-Сұлтан қаласының әкімі тұрғындар тарапынан газдың бағасына деген келіспеушілігі болғанын мойындады.

«Біз мердігерлерден бағаны төмендетуді сұрадық. Мәселен мердігерлер бұрын газға қосу үшін ғана 240 мың теңге сұрайтын. Қазір бұл қызметті 150 мың теңгеге дейін азайттық. Олар келісті. Тұрғындар оған қуанып жатыр. Газдандыру қарқынын азайтпаймыз. Бәрі жоспарда», деді Алтай Көлгінов.

Соңғы жаңалықтар

Су үнемдейтін қондырғы

Технология • Кеше